Атырау тұрғындары жаппай су сатып алып жатыр, жұмыстар жалғасуда

Ведомстволық қызметтер сумен қамту мәселесі екі сағаттың ішінде шешіледі деп сендіргенімен, қазіргі уақытта проблема сол күйі қалып отыр. Атырау тұрғындары  хабар болмағандықтан 5 литрлік және одан да сыйымдылығы мол ыдыстағы суды сатып алуда.

Алайда жөндеу жұмыстары жүріп жатқанда, қалада тағы бір мәселе туындады – ауа температурасы төмен болғандықтан құбырлардың қатып қалу қаупі бар.

«Өзенде мұздың тығыз массасының пайда болуына байланысты мұндай жағдай шамамен 20 жылдан бері байқалмаған», - дейді «Атырау облысы Су Арнасы» КМК су тазарту қондырғылары бойынша басшысы Борис ПЕНКИН. - Жыл сайын қыс мезгілі басталып, өзенде мұз пайда болған кезде кәсіпорын қызметкерлері өз күштерімен күресіп, осы жағдайдан сәтті шығып келеді. Биыл өзенде су деңгейінің күрт төмендеуі байқалды. Тек 9 желтоқсан күні кешке бірнеше сағат ішінде деңгей 15-20 см-ге төмендеді. Кішкентай мұз кристалдары су жинайтын жабдыққа орнатылған балық қорғаныс торларын бітеп тастады». 

Сүңгуірлер жұмыс жасап жатыр

«Соңғы бірнеше тәулікте шығыстан қатты жел соғып, Каспий теңізінің деңгейі айтарлықтай төмендеді, бұл жағдай Атырау қаласы мен қала маңындағы Жаңаталап, Еркінқала ауылдарының сағалық бекеттерінде де деңгейдің төмендеуіне әсерін тигізді, - делінген ӨКҚ баспасөз хабарламасында. - 10 желтоқсан күні сағат 15.00–дегі жағдай бойынша жұмыс істеп тұрған үш су тазарту қондырғысының екеуі мұздан тазартылып, іске қосылды - қондырғыларға судың түсу жылдамдығы қалыпты жағдайда. Сүңгуірлер үшінші су тазарту қондырғысын тазарту жұмысын жалғастырып жатыр».

Ал «Қазгидромет» РМК облыстық филиалының мәліметі бойынша, соңғы аптада өзеннің төменгі ағысында теңіз деңгейі 40 см-ге төмендеген, бұл Жайық өзенінде де су деңгейінің төмендеуіне себеп болды.

Шәуішпен күрес

Өңірлік коммуникациялар қызметі хабарлағандай, қабыршақ мұз төрт себепке байланысты су алуда қиындық тудыруы мүмкін: су жинайтын құрылғылардың бітелуі, соның салдарынан су алатын жабдыққа механикалық зақым келуі. Тағы бір проблема  - су сапасының төмендеуі - мұзбен бірге әртүрлі ластаушы заттар жүруі мүмкін, бұл судың сапасын нашарлатады және судың қалыпты ағынына кедергі келтіруі мүмкін.

«Осы олқылықты жою үшін кешеден бері ТЖД Жедел-құтқару жасағының сүңгуірлері жұмылдырылып жатыр. «Атырау облысы Су Арнасы» КМК және басқа да қалалық коммуналдық қызметтердің барлық материалдық-техникалық ресурстары барынша жұмылдырылған. Су тазарту құрылыстарында облыс әкімінің орынбасары Қайрат НҰРТАЕВ, қала әкімі Шәкір КЕЙКИН, «Атырау облысы Су Арнасы» КМК басшысы Мейірім ҚАЛАУИ және басқа да жауапты тұлғалар үздіксіз жұмыс істеп жатыр», деп хабарлайды әкімдік. 

КМК баспасөз хатшысы Лугзана БАЙЛАУОВАНЫҢ мәлімдеуінше, сумен қамту жүйесіндегі ақауларды жою жұмыстары қарқынды жүргізілуде. Қазіргі уақытта үшінші сүзгі станциясы іске қосылып, алдағы екі сағатта су қысымы көтеріледі деп күтілуде.

«Атырау-Мақат» магистральдық құбыры бағытында, оның ішінде Береке (тоғыз қабатты үйлер), Көктем, Жұлдыз-3, Теңдік, Ақсай 1, Ақсай 2, Құрсай ықшамаудандарына су жіберіледі», - деді Л. Байлауова, - Қысым қалпына келтіріліп жатыр. Сағат 16:30-дағы жағдай бойынша үш су тазарту қондырғысы да іске қосылды. Алдағы екі сағатта сүзу станциясында тазартылуына қарай су беру қысымы көтеріледі деп күтілуде».

P.S. Осындай проблема 20 жыл бұрын емес, үш жыл бұрын ғана болғанын еске салай кетейік. Сол кезде коммуналдық қызметкерлердің айтуынша, кранда судың болмауына да Жайыққа қатқан шәуіш себеп болған. Сол кезде де проблема осылай шешілген еді – қызметкерлер мұзды қолмен ойып, шәуішті ыстық сумен шайған болатын.

Анастасия ШЕРСТЯНКИНА