Нсунгуси «Атырау» сапынан кетеді

Нсунгуси ЭФФИОНГ «Атырау» футбол клубынан кетеді, деп хабарлайды Sports.kz.

«Атырауда» легионер «Кёге» клубынан жалға алу құқығымен ойнады. Енді Дания клубы шабуылшысын сатуға бел буған, алайда бағасы қазақстандық клуб үшін қолжетімсіз болып шықты.

24 жастағы Н.Эффионгқа Еуропадан бір-екі ұсыныс түскенін ескерсек, «Атыраудан» африкалық шабуылшы Венгрия чемпионатына тікелей кетуі әбден мүмкін.

Еске салсақ, «Атырау» сапында Эффионг чемпионатта және кубокта 31 матч өткізіп, 9 гол соғып, 3 нәтижелі доп берді. Қарапайым сөзбен айтсақ, ҚР чемпионатында «Атырау» командасы соның (әрине, Евгений Козловтың да – оның 8 голы бар) арқасында 7-орын алды. Атырау клубы үшін де, атыраулық жанкүйерлер үшін де бұл үлкен шығын.

«АЖ» клуб басшылығына шабуылшының бұрын қанша сомаға жалға алынғанын нақтылауды сұрап сауал жолдады, бірақ олар бұл сауалды елемеуді жөн көрді.

Іңкәр ХАСАН

«Атырау» футбол клубы ұсынған сурет