В Атырау
+26 
Токио оңтүстік Курил аралдарын ресми түрде "Ресей заңсыз басып алған, Жапонияға тиесілі байырғы аумақ" деп атай бастайды. Жапония үкіметі сыртқы саясатының анықтамасы - "Дипломатия жөніндегі көк кітаптың" жаңа шығарылымының қолжазбасында осындай сипаттама қолданылған. Бұл туралы Азаттық радиосы "Киодо Цусин" агенттігіне сілтеме жасап хабарлады.
Жапония Курил қырқасының оңтүстіктегі төрт аралын өзінікі деп санайды. Олар: Итуруп, Шикотан, Кунашир және Хабомаи. Екінші дүниежүзілік соғыстың аяғында бұл аралдарды Совет одағы аннексиялап, ондағы жапондар шығарылған. 1956 жылы Мәскеу мен Токио әскери қимылдарды доғару туралы декларацияға қол қойды, алайда бейбіт келісімге келген жоқ.
2003 жылға дейін жапон дипломатиясы аралдарды ресми түрде "заңсыз басып алынған" аумақ, ал 2012 жылға дейін "байырғы жерлер" деп сипаттады. 2012 жылдан бастап Ресеймен ымыраға ұмтылған жапон үкіметі мұндай анықтаманы қолданбауға тырысты.
Жапония 1956 жылғы декларацияға қайта оралуға дайын болды. Құжатта екі ел арасында бейбіт келісім жасалған соң КСРО-ның Хабомаи мен Шикотан аралдарын Жапонияға қайтаратыны айтылған. 2019 жылы Жапония премьер-министрі Синдзо Абэ Курил аралдары мәселесін түпкілікті шешуге ант қабылдағанын мәлімдеді. Алайда келіссөздер нәтиже бермей отыр.
Биыл наурыздың басында Жапония сыртқы істер министрі Ёсимаса Хаяси үкіметте сөйлеген сөзінде аралдарды "жапонның байырғы жерлері" деп атады. Одан кейінгі баспасөз конференцияларында министр бұл аумақтарды "заңсыз басып алынған" деп сипаттады. Содан кейін Мәскеу Курил аралдарына қатысты бейбіт келіссөздерді тоқтатты.