Нұр-Сұлтанда балаларды мас күйде көлікпен қаққан әйел сотталды

Нұр-Сұлтанда кәмелет жасқа толмаған екі бала мен ересек адамды көлікпен қағып кеткен әйел сотталды, - деп хабарлайды Tengrinews.kz Сарыарқа ауданы № 2 сотының баспасөз қызметіне сілтеме жасап. 

Ерғазинаға қатысты айыптау үкімі 16 қыркүйекте шыққан.

"Сот балалар зардап шегіп, салдары ауыр болғанын ескеріп, 2 жыл 6 ай бас бостандығынан айырып, ең ауыр жаза кесті", - делінген хабарламада.

Сондай-ақ сотталған азамат 10 жыл бойы көлік жүргізу құқынан айырылды.

Іс сотқа "Алкоголь ішіп, мас күйінде жол жүру ережесін бұзып, абайсызда адам денсаулығына залал тигізу" бойынша ҚК 345-1 бабы 2 бөлігі бойынша түскен.

Зардап шеккендер заң аясында жазалауды сұрады. Ал қорғаушы тарап сотталған әйелдің аяғы ауыр және баласы болғандықтан, бас бостандығынан айырмауды өтінді.

Үкім әлі күшіне енген жоқ.