В Атырау +0.1 
Қызылорда облысында заңсыз криптоайырбастау пунктін ұйымдастырушыларға сот үкімі шықты. Қылмыстық схема арқылы олар бір миллиард теңгеден астам қаржы айналдырып, есірткі саудасынан түскен кірістерді заңдастырған.
Құқық қорғау органдарының мәліметінше, айыпталушылар «Астана» халықаралық қаржы орталығының (АХҚО) алаңдарын айналып өтіп, лицензиясыз Binance P2P платформасы арқылы цифрлық активтерді заңсыз саудалаумен айналысқан.
Олар жұмыс істеген кезеңде 1 миллиард теңгеден астам сомаға криптовалюта сатқан, ал заңсыз операциялардан түскен таза табысы 178 миллион теңгені құраған.
Дропперлер мен есірткі ақшасына қатысты схема
Заңсыз айырбастау операцияларынан бөлек, топ мүшелерінің бірі есірткінің заңсыз айналымынан түскен ақшаны заңдастыруға қатысқан.
Қылмыстың ізін жасыру үшін дропперлер, яғни ақша қабылдау және аудару мақсатында өздерінің банк шоттарын үшінші тұлғаларға берген адамдар тартылған. Олардың карталары арқылы жасалған транзакциялардың жалпы сомасы 600 миллион теңгеден асқан. Түскен қаражат криптовалютаға айырбасталып, есірткі саудасымен айналысатын адамдардың криптоәмияндарына жіберілген. Жалпы алғанда, 277 мың USDT аударылған.
Сотталушылар қылмыстық жолмен тапқан табыстарын жүк көліктері мен тіркемелер сатып алу арқылы заңдастырған. Арнайы техниканы жақын туыстарының атына рәсімдеп, кейін компанияларға жалға берген. Осылайша заңды табыс түрінде ақша тапқан.
Сот үкімі
Сот үкімімен ұйымдастырушыларға 2 және 3 жыл мерзімге бас бостандығын шектеу жазасы тағайындалды.
Мемлекет кірісіне тәркіленді:
Жүк тасымалдауға арналған төрт бірлік арнайы техника;
1 миллиард теңгеден астам заңсыз алынған табыс.
Сот үкімі заңды күшіне енді.