Астанада жеткізу роботына қатысты тосын жағдай видеоға түсіп қалды

Астанада жеткізуге арналған автономды роботқа қатысты ерекше жағдайдың видеосы Threads.әлеуметтік желісінде жарияланды.

Кадрларда авариялық шамы қосулы тұрған көліктің жанында артқы дөңгелектеріне сүйеніп қалған робот көрінеді. Сол сәтте қасынан тағы бір робот еш кедергісіз өтіп барады. Видео авторы әзілмен: «Не болды, төбелесіп жатырсыңдар ма?» – дейді.

Роботтың көлікпен соқтығысқаны немесе нақты не болғаны белгісіз. Әзірге ресми түсініктеме берілген жоқ.

Еске сала кетейік, 31 шілдеде Астанада тапсырыстарды жеткізу үшін автономды роботтарды пайдалану бойынша пилоттық жоба іске қосылған. Олар өздігінен бағыт құрып, кедергілерді танып, тротуармен сағатына шамамен алты шақырым жылдамдықпен қозғалады.