В Атырау +38.4 
Түркістан облысы Бәйдібек аудандық мәслихатының депутаты Ерғали Аманбаев жаңа жанжалдың ортасында қалды.
Бұл туралы Halyqstan Telegram‑арнасы хабарлады.
Арнаның дерегінше, Бәйдібек аудандық полиция басқармасына алматылық тұрғын арыз түсірген. Ол Қытайдан келген төрт танысымен Байжансай ауылына барғанын айтқан. Оларды әлеуетті инвесторлар деп атаған.
Halyqstan мәліметінше, кәсіпкерлерді осы өңірдегі қорғасын‑мырыш кенін игеру қызықтырған. Қонақтарды қарсы алып, ертіп жүрген — депутат Ерғали Аманбаев болғаны айтылған.
Әйелдің айтуынша, кейін депутат қонақтарға демалыс ұйымдастырған. Сол кезде 34 жастағы Қытай азаматшасына қатысты оқиға орын алған.
Арызға сәйкес, Аманбаев азаматшаны өз Lexus көлігіне отырғызып, елсіз жерге апарып, еркінен тыс жыныстық қатынасқа түскен.
Telegram‑арна дереккөздерінің айтуынша, Бәйдібек аудандық полиция басқармасы арыздағы мән‑жайды тексеріп жатыр.
Бұл жөнінде полицияның ресми хабарламасы жарияланған жоқ.
Halyqstan сондай‑ақ бұған дейін Ерғали Аманбаев Шымкентте жол ережесін өрескел бұзғаны үшін 2025 жылғы 22 тамызда сот шешімімен бір жылға жүргізуші куәлігінен айырылғанын еске салды.