Ақтөбеде түнгі уақытта жасөспірімдерді қабылдаған компьютерлік клуб жабылды

Ақтөбе қаласында кәмелетке толмағандар істері жөніндегі полиция инспекторлары түнгі уақытта заңды өкілдерінсіз ойын-сауық мекемесінде жүрген жасөспірімдерді анықтады. Бұл туралы Polisia.kz хабарлады.

Тексеру нәтижесінде компьютерлік клубтың заң бұзғаны белгілі болып, нысан иесіне әкімшілік шара қолданылды. Ақтөбе қаласы полиция басқармасы №3 бөлімінің бастығының қаулысымен аталған клубтың қызметі бір айға тоқтатылды. Сонымен қатар нысан иесіне айыппұл салынды.

Полиция өкілдері ойын-сауық мекемелерінің иелеріне кәмелетке толмағандардың құқықтары мен қауіпсіздігін қорғау талаптарын қатаң сақтауды ескертті. Бұл бағыттағы жұмыстар тұрақты бақылауда.