Қазақстанда вице-президент лауазымы енгізіледі

Қазақстан президенті Қасым-Жомарт Тоқаев Ұлттық құрылтайдың V отырысында мемлекеттік басқару жүйесінде жаңа лауазым — вице-президент қызметі пайда болатынын жариялады.

Вице-президенттің міндеттері

• Қазақстанның мүддесін халықаралық форумдарда және шет мемлекеттермен келіссөздерде қорғау;
• Парламентте Президенттің өкілі болу;
• Қоғамдық-саяси, ғылыми және мәдени ұйымдармен байланыс орнату;
• Мемлекет басшысының өзге тапсырмаларын орындау.

Бұл ережелер Конституцияға енгізіліп, мемлекеттік кеңесші лауазымы мен кейбір аппараттық құрылымдар қысқартылмақ. Президент әкімшілігінің функциялары мен құрылымы саяси қажеттілікке сәйкес қайта қаралады.

Тоқаевтың айтуынша, вице-президент институты мемлекеттік басқаруды тұрақтандырып, билік иерархиясына айқындық енгізеді. «Бұл жаңашылдық президенттік биліктің әлсіреуін білдірмейді. Керісінше, президент институты мемлекеттік жүйедегі негізгі әрі шешуші рөлін сақтап қалады», — деді ол.