В Атырау -1 
Мәжіліс депутаты Бақытжан Базарбек бюджет қаражатын жымқыру фактілері бойынша Бас прокуратураға төрт арыз дайындалып жатқанын мәлімдеді. Бұл туралы ол парламент отырысынан кейін журналистерге хабарлады, деп жазады Kazinform.
Мәжілісменнің айтуынша, арыздар денсаулық сақтау, агроөнеркәсіп кешені және МӘМС жүйесі саласындағы кемшіліктерге қатысты, сондай-ақ 27 маусымда бекітілген үкімет есебіне қатысты шағымдар туралы болып отыр. Атап айтқанда, оның назарына «СК-Фармация» ЖШС және ірі фармацевтикалық компаниялардың қызметі ілікті.
- Қазір Жоғары аудиторлық палатаның аудитінің қорытындысы бойынша Бас прокуратураға арыз дайындап жатырмын. Бұл фармацевтика саласына, МӘМС-ке, ауыл шаруашылығындағы субсидияларға және Министрлер кабинетінің есебіне қатысты. Барлығы төрт бөлек арыз беріледі, - деп нақтылады депутат.
Ол қылмыстық іс қозғауға және анықталған деректер бойынша қамауға алуға қол жеткізетінін баса айтты. Арыздардың мәтінін шілде айының соңында әлеуметтік желіде жариялау жоспарланып отыр.