Жоғарғы сот зорлық үшін өмір бойына бас бостандығынан айыру үкімін өзгеріссіз қалдырды

Жоғарғы Сот Төрағасы А.А.Мерғалиевтің төрағалығымен Қылмыстық істер жөніндегі сот алқасы Бас Прокурордың орынбасары Ә.Шындалиев пен қорғаушы-адвокат Н.Қамысбайдың қатысуымен өмір бойына бас бостандығынан айыруға сотталған Қ.-ға қатысты қылмыстық істі қарады.

Бейнеконференцбайланыс арқылы сотталғанның қатысуы да қамтамасыз етілді.

Сот алқасы іс материалдары мен тараптың дәлелдерін зерделей келе, мынадай қорытындыға келді.

Қ.-ның мас күйінде күш қолданып, қорқытып, кәмелетке толмағанға (2018 ж.т.) қатысты жыныстық сипаттағы әрекеттер жасағаны анықталды.

Қ.-ның кінәсі жәбірленушінің, оның заңды өкілінің айғақтарымен, бейнебақылау камерасынан түсірілген бейнежазбамен, сот сараптамалардың қорытындыларымен дәлелденді.

Қ.-ның жазасы қылмыстың ауырлығы, жауаптылықты жеңілдететін мән-жайлардың жоқтығы және ауырлататын мән-жайдың болуы – қылмысты мас күйде жасау ескеріле отырып тағайындалды.

Кассациялық қараудың қорытындысы бойынша сот алқасы сот актілерін өзгеріссіз қалдырды.