В Атырау +1 
Атыраудағы қолөнер көрмесіне қатысушылардың қатарында Индер ауданының шебері Гүлзада ҚАРАБАЛИЕВА бар. Ол шәкірттерімен бірге екі күн ішінде 17 адамнан тұратын командасы киізден жасаған бұйымдарын ұсынды.
— Өзім Орал қаласынанмын, мамандығым — жабдықтаушы, 21 жыл шетелдік компанияда жұмыс істедім. Индерге тұрмысқа шыққаннан кейін осында көшіп келдім. Киіз басумен екі жылдай бұрын, жұмыстан қысқарғаннан кейін айналыса бастадым. Алғашында жүн илеп бастадым, қазір балалар мен ересектерді үйретіп жатырмын. Ең жас шәкіртім — 6 жаста, ал ең үлкені — 80 жаста, — дейді Г. Қарабалиева.
Қазіргі уақытта отбасылық кәсібі бар, халықаралық логистикамен айналысады, бірақ киіз басу оның жанына жақын іс. 2023 жылы ол Франциядағы халықаралық көрмеде Қазақстан атынан өнер көрсеткен. Сапарға URSHYK республикалық бірлестігінің жетекшісі Бибігүл КАРДЕНОВА бастамашы болған. 26 шебердің ішінен бесеуі таңдалып, олар Парижде бір апта бойы ұлттық бұйымдарды таныстырып, шеберлік сабақтарын өткізген.
— Францияда әсіресе киізден жасалған аяқ киімдер жақсы сатылды. Климаты салқын әрі еуропалықтар экоөнім мен қолөнерді жоғары бағалайды. Барлық өнімдер өзіміз қалаған бағамен сатылып кетті, — дейді шебер.
Гүлзада мен оның шәкірттерінің бұйымдары тек меринос жүнінен сабын мен су ғана пайдаланылып қолмен жасалған. Той-томалақтар мен мерекелерге арналған сый бұйымдар Қазақстанда да, шетелде де үлкен сұранысқа ие.
Көрмеге қатысушылардың қатарында қала маңындағы ауыл тұрғындары зейнеткерлер Бақытжан ЖОЛДЫҒАЛИЕВА мен Гүлайым ШОҚАНОВА бар. Олар 2019 жылдан бері киіз басумен айналысып келеді.
— Киіз басу біздің сүйікті хоббиімізге айналды. Тапсырыс бойынша жұмыс істейміз. Ел ішінде сұраныс тұрақты бола бермейді, көп адам қолөнердің құндылығын түсінбейді. Бірақ шетелдіктер үлкен қызығушылықпен сатып алады. Infinity Mall көрмесінде біз екі кілем саттық, олардың бірі — екі метрлігі 80 мың теңгеге өтті. Сондай-ақ, дивандарға арналған жамылғылар мен балабақшаларға кілемшелерге тапсырыс береді, — дейді олар.
Бұрын Атырауға киіз басу өнерінің танымал шебер Ұлболсын ДӘУЛЕНОВА келген. Оның шеберлік сабағына шамамен 70 адам қатысқан, бірақ олардың ішінде санаулы жандар ғана бұл істі жалғастырған. Олардың қатарында Бақытжан апа мен Гүлайым апа да бар. Олардың айтуынша, киіз басу үлкен физикалық төзімділік пен шыдамдылықты талап етеді. Меринос қойының жүнін негізінен Тараздан сатып алады екен.
Киіз басу – қазақтардың ежелгі қолөнері, ол көшпелі өмір салтымен тығыз байланысты. Киізден тек кілем мен киім ғана емес, сондай-ақ киіз үйдің элементтері де жасалған. Бұл материал өзінің қасиеттерімен бағаланған, өйткені ол қыста жылу сақтап, жазда салқындықты қамтамасыз етеді. Ал жүнмен жұмыс істеу – ішкі тепе-теңдікті қалпына келтіріп, табиғатпен байланыс орнатудың бір жолы.
Айнұр САПАРОВА
Суреттер мен видеоны түсірген автор