В Атырау -4 
Miami Herald басылымының хабарлауынша, АҚШ-та қоқыс контейнерінен табылған өнер туындысы 2021 жылы Канададағы галереядан ұрланған бес картинаның бірі болып шықты.
Эдмонтон полиция департаментінің мәліметінше, 2021 жылдың 6 желтоқсанында таңғы сағат 3 шамасында галереяға ұрлық жасалған. Галерея иесі бірнеше заттың орнынан қозғалғанын байқап, кейін бірнеше өнер туындысының жоғалғанын хабарлаған.
Полиция галерея есігін бұзу үшін қолданылған болуы мүмкін металл құбырға дәнекерленген балғаның жартысын тапты.
Art Recovery International ұйымы табылған картинаны "Атаусыз, акварель және қағаздағы сия" деп анықтады. Бұл туындыны ХХ ғасырдағы Канададағы ең маңызды суретшілердің бірі саналатын Жан-Поль Риопель жасаған.
Картинаны иемденген адам оны төрт жыл бойы шкафында сақтап, Нью-Йорктегі аукционда сатуға тырысқан. Ол туындыны қоқыс контейнерінен тауып алғанын және оның шынайы шығу тегін білмегенін айтқан.
Art Recovery International ұйымының бас директоры Крис Маринелло мәлімдегендей, 10 мамырда бұл адам туындыны сақтандыру компаниясына ешқандай талапсыз қайтаруға келіскен.
2022 жылы картинаның құны 50 690 - 57 932 АҚШ доллары аралығында бағаланған.
Үш күн бұрын Канадада тағы бір өнер туындысы – Альфред Пелланның "Әйел бюсті" картинасы 32 жыл өткен соң табылған.
Бұл туынды 1993 жылы Монреальдағы жеке коллекционерден ұрланған және BYDealers аукцион үйінде табылған. Ол Интерполдың ұрланған өнер туындылары базасында тіркелген.
Art Recovery International ұйымы сақтандыру компаниясы өнер туындысын иелеріне қайтаруды ұсынатынын, бірақ олар оны қабылдаудан бас тартса, сақтандыру компаниясы оны сататынын хабарлады.