В Атырау 0 
Атырауда облыстық балалар ауруханасына жаңа магниттік-резонанстық томография құрылғысы ресми түрде қолданысқа берілді,- деп хабарлайды Өңірлік коммуникациялар қызметі.
Халықаралық Балалар күніне орай тарту етілген аппарат өңір тұрғындарының, әсіресе, балалардың денсаулығын жоғары технологиялы әдіспен диагностикалауға мүмкіндік береді. Заманауи талаптарға сай құрылғы тиімді ем-шараларды уақытылы тағайындауға жол ашпақ.
- Бұл тек медициналық құрылғы емес, балаларымыздың денсаулығын қорғауға бағытталған маңызды қадам. Ерте диагноз қою, ауруларды уақытында анықтау – денсаулық сақтаудағы ең шешуші сәттердің бірі. Енді жаңа туған сәбиден 18 жасқа дейінгі балалар қажетті тексерулер үшін алысқа сабылмайды. Жоғары технологиялы аппарат өз өңірімізде де қолжетімді,- деді облыстық балалар ауруханасының басшысы Алмира Сабыргалиева.
Еске салайық, МРТ – ағзаның жұмсақ тіндерін, ми, жұлын, буын және ішкі ағзаларды, әсіресе, неврологиялық, онкологиялық және тірек-қимыл жүйесі ауруларын егжей-тегжейлі зерттеуге мүмкіндік беретін заманауи диагностикалық әдіс. Құрылғы зиянды сәуле бөлмейтіндіктен балаларға қауіпсіз саналады.