Атырауда ауруханада көз жұмған сәбиге қатысты іс тергелуде

Әлеуметтік желіде жүргізілген мониторинг нәтижесінде 10 айлық сәбиінің өліміне дәрігерлерді айыптаған әйелдің видеожазбасы анықталды.

Оның айтуынша, баланың қызуы көтерілген. Келесі күні, 6 желтоқсанда ол жұқпалы аурулар ауруханасына медициналық көмекке жүгініпті, ол кезде сәбидің дене қызуы 38,9-ға жеткен.

«Дәрігер баланы тексеріп, баланың тісі жарып шығып жатқан соң іші кеуіп, қызуы көтерілген шығар деп болжады, - дейді анасы видеода. - Маған облыстық балалар ауруханасына бар деді. Барғаннан кейін баламды тексеріп, жұқпалы аурулар ауруханасына бару керек екенімді айтты».

Сәбидің анасы бес сағат бойы таксимен екі аурухананың ортасында жүрген. Түнде сәби №2 аурухананың жансақтау бөлімінде көз жұмды.

«АЖ» осы жағдайға байланысты мәлімет алу үшін облыстық денсаулық сақтау басқармасына жүгінді. Олардың жауабы мынадай:

«2024 жылдың 6 желтоқсанында сағат 14:51-де №2 облыстық аурухананың қабылдау бөлімшесіне баланың дене қызуы көтеріліп, құсып қойды деген шағыммен анасы медициналық көмекке жүгінді. Баланы қабылдау бөлімшесінің кезекші дәрігері тексеріп, алдын ала диагноз қойды: «Ауа тамшыларының инфекциясы. Өткір іш ауруы?». Стационарлық ем ұсынылды. Алайда, баланың анасы ауруханаға жатудан бас тартып, тиісті қолхат жазған.

Сол күні сағат 16:04-те сәбидің анасы облыстық балалар ауруханасының қабылдау бөлімшесіне барып, баланы хирург пен педиатр қараған. Диагнозды нақтылау үшін кеуде қуысының рентгенографиясы және іш қуысы ағзаларының УДЗ жасалды. Тексеріп, қарағаннан кейін бала №2 Атырау облыстық ауруханасына стационарлық емдеуге жіберілді.

№2 облыстық ауруханаға сағат 18:10-да жүгінген кезде баланың жағдайы ауыр болған. Қабылдау бөлімшесінде кезекші дәрігер дереу реаниматологты шақырып, қарқынды терапия палатасында балаға реанимациялық көмек беріле бастайды. Бала жансақтау бөліміне жатқызылды. Жансақтау бөлімінде директордың, емдеу ісі жөніндегі директор орынбасарының, штаттан тыс инфекционисттің, балалар жансақтау бөлімшесінің меңгерушісінің және реаниматологтың қатысуымен консилиум ұйымдастырылды. Сондай-ақ кеңес алу үшін невропатолог пен офтальмолог шақырылды.

Зертханалық талдау нәтижелері алынған кезде баланың объективті жағдайы қауіпті көрсеткіштерді көрсетті. Жансақтау бөлімшесінде қарқынды терапия және реанимациялық шаралар жүргізілді. Алайда, барлық әрекетке қарамастан, сәби 7 желтоқсан күні сағат 00:20-да көз жұмды».

Осы оқиғадан кейін Атырау облысының денсаулық сақтау басқармасы қызметтік тексеру жүргізу үшін комиссия құрды. Тексеру қорытындысы бойынша тиісті шаралар алынады.

«Атырау облысының денсаулық сақтау басқармасы болған жағдайға байланысты сәбидің отбасына көңіл айтады», - деп түйіндеді облыстық денсаулық сақтау басқармасы. 

Анастасия ШЕРСТЯНКИНА