Халықтың өсу қарқыны қандай?

Ұлттық статистика бюросының 2024 жылдың 1 қарашасына дейінгі мәліме­тіне сәйкес, бүгінде елімізде 20 миллион 243 мыңнан астам адам тұрып жатыр. Оның ішінде қала халқы – 12 727 404 адам, ауылдарда 7 516 577 тұрғын бар, деп хабарлайды Егемен Қазақстан.

Алматы қаласында – 2 280 296, Аста­нада – 1 511 807, Шымкентте 1 249 581 адам тұрып жатыр. Жыл басынан бері халық саны 190 мыңға артты. Елімізде әйелдердің үлесі басым – 10 342 959, ер адамдар – 9 880 259. Тоғыз айда бала туу көрсеткіші де тәуір, 278,7 мың нәресте өмірге келген. Өлім-жітім де төмендемей тұр – 99,5 мың адам.

Алматы қаласының тұрғындары он бір айда 51 621 адамға артқан. Оның ішінде табиғи өсім – 18 824, көші-қон есебінен 32 797 адам шаһар тұрғыны атанған. Түркістан облысының халқы да көбейіп келеді. Он бір айдың ішінде облыс халқының саны 2 142 171 адамнан 2 154 461 адамға жеткен. Дегенмен бұл өңірде табиғи өсім жоғары болғанымен, көшіп кетушілердің де қатары қалың. Алматы облысында бүгінде 1 554 695 тұрғын бар. Елорда халқының өсу динамикасы да жақсы. Қаңтар айын­да Астанада 1 430 105 адам тұрса, 1 қарашадағы көрсеткіш – 1 511 807. 11 айда бас қаланың тұрғын саны 81 702 адамға көбейді. Үшінші мегаполис Шымкент қаласының халқы да 11 ай­дың ішінде 27 515 адамға артқан. Мил­лионнан астам халқы бар Жамбыл облысында қаң­тар айында 1 222 593 тұрғын болса, 1 қа­рашадағы деректе 1 222 835 адамға жеткен. Қарағанды облысында керісінше халық саны кеміген. Қаңтар айында облыс­та 1 135 351 тұр­ғын болса, 1 қарашадағы де­рек­те өңір халқының саны – 1 134 132 адам.

Статистикалық мәлімет бойынша, 11 айда 22 955 адам елімізге көшіп келсе, 11 259 адам елімізден қоныс аударып, көші-қон сальдосы 11 696 адамға жеткен. Былтырғы көрсеткішпен салыстырғанда елімізге көшіп келушілердің қатары артқан, көшіп кеткендердің саны аз.

Өлім-жітім Солтүстік Қазақстан (11,52 мың), Шығыс Қазақстан (11,32 мың), Қостанай облыстарында (10,12 мың адам) жоғары. Сарапшылар мұ­ны бұл аймақтарда жасы ұлғайған тұр­ғын­дардың басымдығымен байланыс­тырады.