Александр МИЛЮТИН, ҚР Мәжілісінің депутаты:
- Орташа статистикалық зейнеткер бағасы инфляцияны ескеру арқылы есептелетін автокөлік сатып алмайды. Оның зейнетақысы өмір сүруге қажетті әлеуметтік маңызы бар тұтыну тауарлары мен қызметтерді алуға жетуі тиіс.
(Премьер-министрге зейнет жасын қайта қарау туралы депутаттық сауалда айтылды)
Мақсат РАМАНҚҰЛОВ, ҚР Парламенті мәжілісінің депутаты:
- Егер салық органдары шынымен де алаяқтарды ұстап, бюджетті толтырғысы келсе, онда олар адал еңбекпен айналысатындардан емес, жемқор шенеуніктерді ұстап, оффшорлық есепшоттардан халықтан ұрланған қаражатты қайтарып алсын.
(Биліктің онлайн-аударымдарға салық салуды енгізу жоспарына қатысты айтылды)
Мағзұм МЫРЗАҒАЛИЕВ, ҚР экология, геология және табиғи ресурстар министрі:
- Мемлекет басшысы бес жылда екі миллиард ағаш отырғызуды тапсырды. Ал сіздер өткен жылы бір гектар жерге жасыл желек отырғызып, оны «ауқымды жұмыс» деп есептейсіздер.
(Аймақты көгалдандыру мәселесі бойынша ТШО, АМӨЗ және басқа мекеме басшыларына айтылды)
Асан ДАРБАЕВ, ҚР Табиғи монополияларды реттеу комитетінің төрағасы:
- Адамдарға есептеулеріңіз дұрыс екенін айтып сендіріп көріңіз, сендіре алмайсыздар. Біз цифрлық заманда өмір сүріп жатырмыз, ақпаратты жеткізу өте оңай, ашық болыңыздар.
(Атыраулық монополистерге айтылған)
Макс БОҚАЕВ, азаматтық белсенді:
- Мен жиналған салықтың көп бөлігін Нұр-Сұлтандағы «шаңсорғыш» бәрін сорып алып, кейін бір шенеуніктер ойына келген нәрсеге бөлмес үшін жергілікті жерде қалдырып, өңірлердің экономикалық мүмкіндігін арттыруға атсалысамын.
(«AЖ»-ға берген сұхбатында айтылды)
Серік ЕРУБАЕВ, Қазақстан Республикасы Мәжілісінің депутаты:
- Мәселен, бір компанияда жергілікті инженердің сағаттық тарифі 568 мың теңге, ал шетелдікке 6,5 миллион теңге деп белгіленген, яғни 12 есе жоғары.
(Парламент отырысында айтылды)
Қасым-Жомарт ТОҚАЕВ, Қазақстан Президенті:
- ...Жайық өзені қатты суалып, экологиялық ахуалы күрт нашарлап барады. Былтырғы желтоқсанда Қазақстан-Ресей ынтымақтастығының 2024 жылға дейінгі бағдарламасы қабылданды. Бұл құжаттың негізгі мақсаты – Жайық өзені аңғарының экожүйесін сақтау.
(Үкімет отырысында айтылды)
«KEGOC» АҚ облыстық филиалының директоры Константин ЧЕРНОХАЕВ:
- ...Бұл жәй жаңбыр емес - оның құрамында сымдардың оқшауламасын бұзатын әлдебір зат болды. Ол кеуіп болғанша, әбігерге түсіп, «ақырзаман» басталды ма деп қалдық.
(Жарықтың жиі өшуіне қатысты өткен брифингте айтылды)
Ержан ЕСІМХАНОВ, блогер:
- Партияда жетекшіні елден бұрын әрі асыра мақтайтын адамды жақсы бағалайды. Ең күшті мақтау жолдаған адам парламент депутаты болады. Бұл сол еңбегінің жемісі.
(Facebook-та жарияланды)
Қазақстан президенті Қасым-Жомарт ТОҚАЕВ:
- Тұтас буын алмасқан осы жылдарда қазақ тілін үйренгісі келген адам оны әлдеқашан біліп шығар еді. Халқымызда «Ештен кеш жақсы» деген сөз бар.
(«Тәуелсіздік бәрінен қымбат» мақаласынан)
Ескене станциясының тұрғыны:
- Біздің экономикамыз бен халқымыздың тұрмыс жағдайын Жапониямен немесе Еуропа елдерімен салыстыруға болмайды. Біздің жалақымыз осы елдердегі тұрғындардың бір түскі асына тең. Әрі қарай өзіңіз есептеңіз. Сіздерден зиян келері сөзсіз.
(Мақат ауданындағы ГӨЗ құрылысына қатысты қоғамдық тыңдауда айтылды)
ҚР Сыртқы істер министрі Мұхтар ТІЛЕУБЕРДІ:
- Қазақ ретінде, Қазақстан азаматы ретінде бұл намысыма тиеді. Отанымыздың тарихын білгендіктен, орыс тілінде «это бред сивой кобылы» деп жауап берер едім. Мұндай мәселелер көтерілгенде бірінші кезекте тарихқа сүйену керек.
(РФ Мемлекеттік думасының депутаттары Никонов, Федоров және Жириновскийдің мәлімдемелеріне қатысты пікірі)
Қазақстанның тұңғыш Президенті Нұрсұлтан НАЗАРБАЕВ:
- Егер сын айтылса, оппозиция болса, олар міне, мынау дұрыс емес, оны былайша сындарлы етіп жасайық деп өз ұсыныстарын білдіріп отыруы тиіс. Оппозиция дегеніміз сол. Бірақ мұндай оппозиция болған жоқ.
(Қазақстандағы оппозиция туралы «Штрихи к портрету» деректі фильмінде айтылды)
ТШО-ның үкіметпен және жұртшылықпен байланыс жөніндегі бас менеджері Рзабек АРТЫҒАЛИЕВ:
- Кейбір мердігер мекеме қызметкерлерінің жалған ПТР анықтамаларды қолданып, санитарлық бекеттерден өткені анықталды. Шұғыл арада бұл қызметкерлерге берілген рұқсат қағазының күші жойылды.
(Онлайн-брифинг барысында айтылды)
«Нұр Отан» партиясының бұрынғы мүшесі және ҚР Мәжілісінің экс-депутаты Нұржан ӘЛТАЕВ:
- Мен парламенттің де, партияның да өткір әрі ашық сөйлейтіндерді, жоғары жақтың мақұлдауынсыз үкіметті сынағандарды ұнатпайтынын көрдім. Бұл, әрине, жақсы емес. Парламентте шындықты сол күйінде айтуға батылы жететін депутаттар отыруы тиіс.
(Жаңа саяси партия құруға қатысты айтқаны)
Қазақстан Президенті Қасым-Жомарт Тоқаев:
- Қазақстан бизнес жүргізу үшін қолайлы жағдайлар жасалған дамыған елдер тобына енуі керек. Кез-келген заңсыз кедергілер ауыр қылмыс болып саналады.
(Nur Otan партиясының кезектен тыс съезінде айтылды)
Қазақстан мен Ресей сарапшыларының Жайықты зерттеу нәтижелері туралы баяндамасынан:
«...Жайық бассейнінде миллиондаған тонна өнеркәсіп қалдықтары, соның ішінде, байыту фабрикаларының қалдықтары, аршыма тау жыныстары мен қоршаушы жыныстар жиналып қалған. Өнеркәсіп қалдықтарын сақтау үшін полигондар мен үйінділерге мыңдаған гектар жер бөлінген...».
Қазақстанның тұңғыш президенті Нұрсұлтан НАЗАРБАЕВ:
- Біз әр бала мектептен кейін мемлекеттік тілде оқып, жазып және сөйлей алатындай жағдай жасауымыз керек. Бұл оларға мемлекеттік қызметтің, экономиканың барлық саласында жұмыс істеуіне мүмкіндік береді.
(Қазақстан халқы Ассамблеясы кеңесінің отырысында айтылды)
Ұлбала САНАЛИЕВА, Доссор кентінің тұрғыны:
- Кезінде осы жерден мұнай шыққанда, бұл үйлерді ағылшындар өздеріне деп уақытша тұрғызған. Сапалы салынғаннан ба, бір ғасыр өтсе де құламай тұр. Барар жеріміз болмағасын осы үйде амалсыз тұрып жатырмыз.
(ХХ ғасырдың басында салынған апаттық жағдайдағы үйіне қатысты айтқаны)
Атырау облыстық Табиғи ресурстар және табиғат пайдалануды реттеу басқармасының басшысы Қадыржан АРЫСТАН:
- ...Олардың дұрыстығы күдік тудырады. Себебі барлығы «қолмен» атқарылады. Ол жерде ауадағы зиянды заттардың концентрациясын бақылайтын оператор отыр, ал көрсеткіштерді қолмен жазады. 20 станция деректерді әр 20 минут сайын көрсеткен кезде ШРК-дан асып кетуді байқап, жазып алу – бұл өте күрделі жұмыс.
(Брифингте NCOC және АМӨЗ ауа сапасын бақылау станцияларының деректеріне қатысты айтылды)
Қасым-Жомарт ТОҚАЕВ, Қазақстан Президенті:
- Алдағы сайлау еліміздің саяси жүйесін жаңартуды қамтамасыз ететін саяси институттарды дәйекті түрде демократияландыруға және жаңғыртуға Қазақстанның аса ықыласты екенін тағы да бір дәлелдейтін болады.
(ҚР Парламенті Мәжілісі және мәслихат депутаттары сайлауын тағайындау туралы үндеуінен)
Алексей ЦОЙ, денсаулық сақтау министрі:
- Егер біз қазір қатаң шаралар қолданып, әрқайсымыз халқымыздың денсаулығын сақтауға атсалысатын болсақ, онда тіпті қатаң локдаун енгізілмеуі мүмкін. Бірақ ол үшін бәріміз бірігіп, қазір елімізде қолданылып жатқан шектеу шараларын сақтауға барынша жұмылуымыз керек.
(ОКҚ брифингінде айтылды)
Мағзұм МЫРЗАҒАЛИЕВ, экология, геология және табиғи ресурстар министрі:
- Қазақстанда жан басына шаққанда балықты аз тұтынады. Айталық, Дүниежүзілік денсаулық сақтау ұйымы адам басына шаққанда жылына 16 келідей балық тұтынуды ұсынса, Қазақстанда бұл көрсеткіш бір адамға 4 келіден келеді.
(Үкімет отырысында айтылды)
Алексей ЦОЙ, Денсаулық сақтау министрі:
«Халықтың босаңсып кеткенін көріп отырмыз. Бетперде кию, ара қашықтықты сақтау талаптары үнемі орындала бермейді. Бұл Қазақстанда коронавирустың таралуына және карантин режимін күшейтуге әкеп соғуы мүмкін».
(Үкімет отырысында айтылды)
2020 жылдың шілде айында Атырау облысында түрлі себеппен 1165 адам қайтыс болған. Өткен жылдың шілдесімен салыстырғанда өлім-жітім 3,6 есеге артқан.
(ҚР Статистика комитетінің мәліметі бойынша)
Досым СӘТПАЕВ, саясаткер:
- Реформалар жөніндегі жаңа Жоғарғы кеңесте оның мүшелерінің кем дегенде жартысы қазір реформалайын деп отырған өте тиімсіз, олигархиялық, квазимемлекеттік экономиканы құруға белсенді атсалысты. Алдымен проблема туындау үшін қолдан келгеннің бәрін жасап алып, кейін салтанатты түрде сол проблеманы жою әрекетіне басшылық ету керек деген ескі әзілдегідей болды. Логикалық тұрғыдан алғанда, бұрынғы министрлердің бәрін қатыстырып, әр министрлікте және бұрынғы әкімдердің бәрін қатыстырып, әр әкімдікте реформалар жөніндегі осындай кеңесті құру керек.
(Реформалар жөніндегі Жоғарғы кеңестің құрылуына қатысты Facebook парақшасында айтылды)
Петр СВОИК, экономист:
- Адам неғұрлым бай болып, өзінің тұрғын үй мәселесін сенімді түрде шешкен болса, оның соғұрлым өзіне қажет те емес тұрғын үйге жұмсау мүмкіндігі мол болады. Ал адамның проблемасы неғұрлым көп болса, соғұрлым аз ақша жұмсай алады. Салымшылардың көпшілігі ақшаны алып та, жұмсай да алмайды, өйткені жинағаны жеткілікті мөлшерге жетпейді.
(Зейнетақыны мерзімінен бұрын алу туралы 365info.kz-ке берген сұхбатынан)
Досым СӘТПАЕВ, саясаттанушы:
- ... Егер мемлекет адам капиталының сапасын төмендете отырып, өзінің білім беру жүйесін құртатын болса, егер ол мемлекеттік көзқарасты, адалдықты және билік басындағылардың бір нәрсені жақсы жаққа өзгертуге деген ұмтылысын емес, бейілділік пен сауатсыздықты көбірек қолдайтын болса, егер тек бүгінгі күнмен өмір сүретін болса, онда ол өзіне ғана емес, бүкіл елге көр қазғанмен бірдей. Қазақстанға келер болсақ, бұл көр жартылай қазылған.
(Telegram-дағы жеке парақшасында айтылған)
Бағдат ҚОЖАХМЕТОВ, Денсаулық сақтау министрлігінің ресми өкілі:
- Сау адамның сол тізімге ену үшін тырысудың керегі бар ма? Белгілі бір әлеуметтік ереже мен заңдар бар ғой. Дені сау, еңбек ететін адам өзін-өзі қамтуы керек. Оның ішінде, вакцинамен де. Бұл - менің жеке ұстанымым. Кез келген саналы адам менімен келіседі деп ойлаймын.
(Неліктен азаматтар медициналық сақтандыру қорынан немесе кепілдендірілген тегін көмек аясында коронавирусқа қарсы вакцинаны ала алмайды деген сұраққа жауабынан)
Юрий ДУДЬ, ресейлік журналист:
- Погон таққан күші мығым ұл-қыздарсыз бірде-бір мемлекет болмайтынын түсінемін. Бірақ сіздер қарусыз жерлестеріңізге зақым келтіру үшін супермен болып жаттықпаған шығарсыздар. Егер сіздер мұны өз еріктеріңізбен жасасаңыздар, онда сіздердікі дұрыс емес деп ойлаймын. Егер сіз басшылықтың бұйрығын орындаған болсаңыз, онда мұндай басшылықты ...орнынан қуу керек.
(Беларусь күш құрылымдарына үндеуінен)
Шынар ІЗТІЛЕУОВА, экология жанашыры:
- Егер коронавирустың екінші, үшінші толқыны болса, экологиялық осал аймақтар халқының иммунитеті нашарлығынан зардап шегетін болады.
(Атырау облысының экологиялық проблемаларына арналған онлайн-кеңесте айтылды)
Досым СӘТПАЕВ, саясаттанушы:
- Мемлекеттің нашар менеджер екеніне көзіміз жетті. Бірақ мәселе мынада - әмиян осы "менеджердің" қолында және қаражатты мақсатқа сай емес, мемлекетпен үлестес шалбарлылардың реңдік үйлесіміне қарай бөледі.
(Facebook-тегі жеке парақшасында айтылған)
Ержан ЕСІМХАНОВ, заңгер:
- Халыққа зейнетақы жинағының бір бөлігін пайдалануға мүмкіндік беру керек, бұл орынды. Бірақ мұны адамдарға да, экономикаға да пайдасы тиетіндей ойластырып жасау керек.
(Facebook-тегі жеке парақшасында айтылды)
Олжас ҚҰДАЙБЕРГЕНОВ, президент кеңесшісі:
- Өкінішке орай, біздің үкімет төлем жасау үшін құқықтық негіз таба алмай отыр. Ал адамдар үкіметтің осындай «көзқараста» жұмысын жалғастыруын моральдық жағынан негізсіз деп есептейді. Бірақ үкімет тарап кетіп, орнына жаңа адамдар келсе де билікте өзгеріс болмайды. Ол үшін жаңа тұлғалар мен жаңа ереже қажет. Сонда ғана эпидемияның келесі толқындарына төтеп беріп, осынша қайғылы жағдайға жеткізбеуге мүмкіндік болады.
(Facebook-тегі жеке парақшасында айтылды)
В Атырау -1 