Барлық дәйексөз

АҚШ президенті Дональд ТРАМП:

- Білесіздер ме, Қазақстан - өте бай ел. Менің соңғы сапарым кезінде олардың барлығы (кім туралы екенін нақтыламады - Sputnik) «рахмет» айтты. Алайда олар бізге неге төлемейді? Олар неге күреспейді?

(АҚШ қорғаныс министрінің экс-спичрайтері Гай Снодграстың кітабынан үзінді)

Атырау облысы әкімі Нұрлан НОҒАЕВ:

- - Елбасы, “Nur Otan” партиясының төрағасы, партияның саяси кеңесінің кеңейтілген отырысында сыбайлас жемқорлыққа қарсы күресті түбегейлі күшейту қажеттігін айтты. Сондай-ақ, Мемлекет басшысының «егер қол астындағы қызметкері сыбайлас жемқорлық қылмыстары үшін сотталса, мемлекеттік қызметші отставкаға кетуге өтініш беруі тиіс, шешімді басшылық шығарады» деген тапсырмасы бар. Егер бұл адамдардың (қазір сотталып жатқан білім саласы басшылары мен қызметкерлері – «АЖ») кінәсі дәлелденсе, мен жауапкершіліктен қашпаймын.

 («АЖ»  сұрағына берген жауабы)

Атырау облыстық экология департаментінің басшысы Абай САФИН (брифингте берген жауабынан):

- Осы газ шығарындылары болған кезде өзіңіз қаладан иіс сезесіз бе?

- Әрине, ауада иіс бар екенін сеземін. Шағымдар бойынша шығамыз, санитарлық қорғау аймағының шекарасында өлшеу жүргіземіз: иіс бар, бірақ шектен шықпаған. Біздің бекеттеріміз шығарынды көзі туралы нақты ақпарат бере алмайды... Тіпті, қазір «Қазгидромет» мөлшерден асқандығын көрсетсе де, қай нысаннан шығып жатқанын іздеуге тура келеді. Тауып болғанша, шоғыр тарап кетеді.

Рзабек АРТЫҒАЛИЕВ, ТШО-ның жұртшылықпен және үкіметпен байланыс жөніндегі бас менеджері:

- «Теңізшевройл» ананы-мынаны салу керек деп жиі айтады. Алайда ол ешкімге міндетті емес, ал жергілікті әлеуметтік қажеттілікке салынып жатқан қомақты қаржылар ерікті түрде бөлінеді. Біздің бірнеше бағдарламамыз бар, сол бойынша түрлі нысандар саламыз. Біз миллиардтаған салық төлеп жатырмыз, қайда кетіп жатқанын мемлекеттік органдардан сұраңдар.

(ТШО өкілдерінің жұртшылықпен кездесуінде айтылды) 

Қазақстан Президенті Қасым-Жомарт ТОҚАЕВ:

Біз ең бірінші кезекте, дәл осы елорданы газдандыру жайында ойлауымыз керек еді. Өйткені, қыста не орын алатынын жақсы білесіздер: қала түтінге оранып, ең алдымен, тұрғындардың, сондай-ақ қаламызда тұратын дипломатиялық корпус, шетелдік-экспаттар алдында ыңғайсыздық туындайды. Бұл өзімізді халықаралық хаб, глобал сити, Еуразияның жүрегі, орталығы деп танитындығымызға сын. Яғни, іс пен сөз қабыспай жатыр, бұл дұрыс емес.

(Астананың әрі қарай дамуы мәселелері жөніндегі жиында шенеуніктерге айтқаны)

Гүлнар ЖАКИЕВА, «Ұлттық медицина қауымдастығы» ҚБ Атырау филиалының президенті:

- Қазір аурулар бұрынғыдай емес, басқаша дамиды. Бұған әр адамның өз реакциясы болуы мүмкін. Ал пациенттер интернеттен түрлі нәрсені оқиды да, дәрігерлерге қалай емдеуді үйретеді, содан соң оларды сотқа береді. Дәрігерлердің мәртебесі құрдымға кетті. Медицинадан бейхабар адвокаттар, судьялар көп нәрселерді түсінбейді. Сондықтан Атырау облысында дәрігерлер мен пациенттер арасындағы дауларды сот ісіне жеткізбей шешу үшін медициналық медиация ашу қажет деп санаймын. Мұндай қызметтер қазір бізден басқа облыстардың бәрінде бар.

(«Дәрігерлер мен пациенттер - әркімнің өз шындығы бар» дөңгелек үстелінде айтылды)

Қазақстан Президенті Қасым-Жомарт ТОҚАЕВ:

- Мен жаңа президент ретінде ең алдымен заманауи әлеуметтік мемлекет құруға мүдделімін. Менің негізгі мақсатым – миллиондаған отандастарымның кең ауқымды реформалардың игілігін көріп, мықты экономикасы, жоғары сапалы білімі және заманауи медицинасы бар қоғамда еш кедергісіз еркін өмір сүруіне қол жеткізу.

(Нью-Йорктегі БҰҰ Бас Ассамблеясының Жалпы дебатында айтылды)

Руслан ДАЛЕНОВ, ҚР Ұлттық экономика министрі:

- Біз алдымызға 2025 жылға қарай үздік жиырмалыққа кіру мақсатын қойдық. Бұл бүгінде Финляндия, Австралия және Латвия сияқты елдердің деңгейі. Сауда мен көлік инфрақұрылымының дамуы жағынан Қазақстан 2025 жылы үздік 40-қа кіруі қажет. Израиль, Исландия және Малайзия сияқты елдермен қатар тұрамыз. Бәсекеге қабілеттілік тұрғысынан да Қазақстан топ-40 арасында болуы керек. Яғни, Италия, Эстония және Чили елдерінің деңгейіне жетеміз.

(Үкімет отырысында айтылды) 

Қазақстан Президенті Қасым-Жомарт ТОҚАЕВ:

- Соңғы уақытта "жер шетелдіктерге сатылады екен" немесе "көрші елдің 55 ескі зауытын көшіреді, оған шетелдік жұмыскерлер тартылады екен" деген сияқты қауесет әңгімелер тарап жүр. Халқымыз мұндай даңғаза әңгімелерге ермеуі қажет. Ондай алып-қашпа әңгімелерді пейілі жаман адам таратады. Олар халықтың патриоттық ұстанымына шебер манипуляция жасап, эмоцияға тез берілетін, сезімтал адамдарды өз мақсаттарына жету үшін пайдаланады. 

(Ұлттық қоғамдық сенім кеңесінің 1-отырысында айтылды) 

ҚР Парламенті Мәжілісі төрағасының орынбасары Владимир БОЖКО:

- Биліктің не істеп жатқанын көріп-түсіну үшін жақсылап ойланған жөн. Бір-ақ санға назар аударыңыз – халықты әлеуметтік қорғау соңғы үш жылда 17 есе артыпты. Ғапу етіңіз, бұл үшін тізе бүгіп, мемлекетке алғыс айту керек. Түк нәрсе істемей, кейін «маған бәрін бер» деп дүрсе қоятын адамды орнына қоятын қоғамдық пікір болғаны жөн.

(Қазақстан халықтары ассамблеясы кеңесінің кеңейтілген отырысы сырытында айтылды)

Ермұхамбет ЕРТІСБАЕВ, ҚР-дің Белорусьтегі бұрынғы елшісі:

- Қазақстан электоралдық революция кезеңіне өтті, Ресей де солай. Украина, Грузия, Арменияда бұл үдеріс ертерек болды. Электоралдық революция деп адамдардың көп бөлігі тек сайлауға қатысып қана қоймай, сайлаудың барлық процесін, әсіресе, дауыс санауды бақылауда ұстауға тырысатынын айтамын. Халық биліктің қайнар көзі екенін түсінді және мұны шынайы қалыптастырып, барлығын өз қолына алғысы келеді. Алда болатын парламент және жергілікті билік органдарына сайлау үлкен сынақ болары сөзсіз.

(Tengrinews.kz-ке берген сұхбатында айтылды)

Қазақстанның Бірінші Президенті Нұрсұлтан НАЗАРБАЕВ:

- Қазір отыз жыл бұрынғыдай «Маған бер, көп балам бар, жалақым аз, бер" деп ұрандайды. Ал бұрын қайда қарадың? Бұл сенің проблемаң емес пе, кезінде мемлекеттен кеңес сұраған жоқсың ғой. Егер мемлекет өз міндетін орындап, беріп жатса, "жоқ, аз, тағы бер" дейді.

(Nur Otan партиясы саяси кеңесінің кеңейтілген отырысында айтылды)

Саясаттанушы Досым СӘТПАЕВ:

- Мен үшін бұл – биліктің қоғаммен диалог жүргізе бастағанын көрсету үшін пайдаланғысы келетін жалған құрылымы. Бірақ кеңес құрамында азаматтық пікірі айқын, ары таза, қоғамды өзгерткісі келетін бірнеше адам да бар. Бұлар Ұлттық қоғамдық сенім кеңесінде нақты мәселелер көтеріп, консервативтік билікке соққы беруге жұмыс істей алады. Олар өз ұсыныстарының билік тарапынан қабылданбағаны үшін Ұлттық кеңестен шықса, бұл қоғамда билікке қарсы жаңа наразылық талаптарының тууына себеп болуы мүмкін.

(Ұлттық қоғамдық сенім кеңесі жайлы «Азаттық радиосына» берген сұхбатында айтылды)

Мәншүк АЙМҰРЗИЕВА, Атырау облысы әкімдігінің  денсаулық сақтау басқармасының басшысы:

- Дәрігерлердің барлығының дерлік жеке көліктері бар. Біз стационарларды дәрігерлердің мүдделеріне қарай салуға тиіс емеспіз, пациенттер үшін тырысуымыз керек. Бұл жер өзеннің сол жағалауы қарқынды дамып жатқандығы ескеріліп, таңдалды.

(Талқайраң поселкесінде жаңа облыстық аурухана құрылысына қатысты «АЖ» сұхбатында айтылды)

Қырымбек КӨШЕРБАЕВ, Президент әкімшілігінің басшысы:

Ғабидолла Әбдірахымов ел билігінен қолдау тауып, таудай сенім арқалады. Өкінішке қарай, мұны өзі жеткілікті түрде ұғынған жоқ. Оның қылықтары БАҚ пен әлеуметтік желілерде егжей-тегжейлі жарияланып жүрді. Мұның бәрі дәл қазіргі уақытта – халық мемлекет қолдауына мұқтаж болып отырғанда, Арыс енді ғана еңсесін тіктеп, Түркістан жаңарып, еліміз жаңа заманның сын-қатеріне жауап іздеп жатқанда болды. Бұл - Мемлекет басшысының тапсырмаларына кереғар, биліктің абыройын түсіретін жағдай. Бүгінде Ғабидолла Әбдірахымовқа артылған саяси сенім шегіне жетті.

(Шымкент қаласының жаңа әкімін таныстыру кезінде айтылды)

Мұхтар ЖӘКІШЕВ, «Қазатомпромның» бұрынғы басшысы:

- Шындық – бұл кесел емес, оны егуге немесе жұқтыруға болмайды. Шындық әрқайсымыздың ішімізде. Әр адам өз таңдауын жасауға құқылы. Шын сөзді сыбырлап айтсаң да, жаңғырығы жер жарады деп есептеймін.

(Оны шартты-мерзімінен бұрын босату туралы мәселені қараған сот отырысында айтылған. 24 шілде 2019 жыл)

Экономист Олжас ҚҰДАЙБЕРГЕНОВ:

 - Ұлттық кеңес құрамында бұқара халық сенбейтін тұлғалар бар кезде бұл ұйымды Ұлттық сенім кеңесі деп атау дұрыс емес. Жартылай сенім деген болмайды. Сонымен қатар, Ұлттық кеңес құру – қоғаммен тығыз байланыста болуы тиіс Парламент пен мәслихаттардың тиімсіз екенін мойындау.

(Ұлттық қоғамдық сенім кеңесін құруға қатысты айтқаны) 

Қазақстан Президенті Қасым-Жомарт ТОҚАЕВ:

Азаматтарымыздың еңбек құқықтарын қорғауға үлкен көңіл бөлген жөн. 4 маусымда Атырау қаласында бірдей еңбек ететін жергілікті және шетелдік жұмысшылардың жалақысын әділ беруді тапсырған болатынмын. Үкіметке бұл мәселені соңына дейін анықтауды тапсырамын. Асқар Ұзақбайұлы (Мамин – ред.), еңбек жағдайы, жұмысшылардың жалақысы бойынша егжей-тегжейлі сараптама жасауыңызды сұраймын. Егер инвесторлармен жасалған келісімшартқа өзгеріс енгізу қажет болса, мұны күн тәртібінен түсірмеген жөн. Әрине, бұл оңай жұмыс емес, түсінемін, бірақ бұл мәселені шешу қажет

(Үкіметтің кеңейтілген отырысында айтылды)

ҚР Қорғаныс министрі Нұрлан ЕРМЕКБАЕВ:

- Бұл жерде (Арыстағы жарылыс) ешкімді кінәлауға болмайды, бұл – табиғи құбылыс, арсеналдың барлығы қауіпті. Мен әзірге кешірім сұрайтындай еш себеп көріп тұрған жоқпын.

(Парламент мәжілісінің сыртында айтылды)

Атырау облысы әкімі Нұрлан НОҒАЕВ:

Мемлекет басшысының бірдей жұмыс істейтін мамандардың азаматтығына қарамай, бір мөлшерде лайықты еңбекақы төлеу жөнінде тапсырмасы бар. Иә, белгілі бір қызметтік иерархияға келісемін, барлығын теңестіруге болмайды, бірақ әділдік болуы тиіс. Бір ұжымда бірдей жұмыс істеген екі адамның бірі 300 доллар, екіншісі 3000 доллар алмауы керек, адамдар көріп отыр.

(Ірі мұнай компаниялары мен олардың мердігерлерімен өткізген жиналыста айтылды)

Блогер Ғалым АҒЕЛЕУОВ:

- Адамгершілік тұрғыдан биыл Астана күнін тойламау дұрыс болатын сияқты, осы мерекені атап өтуге бюджеттен бөлінетін қаржыны Арыс қаласын қалпына келтіруге пайдаланған жөн. 

Қазақстан Президенті Қасым-Жомарт ТОҚАЕВ:

- Демонстранттар турасына келсек – иә, олар наразылық білдіріп көшеге шықты. Қазір митингіге қатысқандардың талаптары қаралып жатыр. Негізінен бұл – әлеуметтік сипаттағы талаптар. Бұл мәселелердің бар екенін жоққа шығармаймын. Жалпы айтқанда, олар адамдардың кедейленуінен туындап отыр. Олар үкіметтен көкейтесті әлеуметтік-экономикалық проблемаларды шешуді сұрайды. Билік мұны естіді. Осы бағытта жұмыс істейтін боламыз.

(Euronews телеарнасына берген сұхбатында айтылды)

ҚР Президенті Қасым-Жомарт ТОҚАЕВ:

- Маған зор сенім артып, қолдау көрсеткен барша Қазақстан халқына алғыс айтамын! Бұл сайлау, шын мәнінде, демократия талаптарына сай өтті. Сайлау алаңында нағыз ашық бәсекеге түсу мүмкіндігі болды. Саяси бағдарламалар сайысқа түскен әділ дода болды.

(2019 жылы 12 маусымда ҚР Президентін ұлығылау рәсімінде айтылған)

Саясаттанушы Досым СӘТПАЕВ:

- Бірыңғай қаржы нарығын құру туралы әңгіме қозғалғанда Ресей бірыңғай валюта жасау тақырыбын алға тартқанды ұнатады. Бұл тек Қазақстанда ғана емес, Белоруссияда да қарсы әсерлер туғызды. ЕАЭО аясында бірыңғай валютаның пайда болуы – бұл экономикалық тәуелсіздік тұрғысынан үлкен қатер.

(«Караван» медиа-порталына берген сұхбатында айтылды)

Қазақстанның Бірінші Президенті Нұрсұлтан НАЗАРБАЕВ:

- Мен еліміздің өркендеуі үшін жұмысымды жалғастырамын. Алайда елімізде ешқандай қосбилік болмайтынын атап айтқым келеді. Барлығымыз халық сайлаған президентке жұмыс істейміз.

(үміткер Қасым-Жомарт ТОҚАЕВТЫҢ республикалық қоғамдық штабына барған кезде айтылған)

Украина президенті Владимир ЗЕЛЕНСКИЙ:

- Депутаттардың қолсұғылмаушылығы туралы заңды жойып, заңсыз баю туралы заң қабылдауды өтінемін... Кабинеттеріңізге менің суретімді ілмеңіздер. Президент - мінәжат ететін нәрсе емес.

(20 мамырда президентті ұлықтау рәсімі кезінде айтылды)  

Ақпарат және қоғамдық даму министрі Дәурен АБАЕВ:

Ақпарат және қоғамдық даму министрлігі байланысқа жауап бермейді. Бұл - біздің міндетіміз емес. Сондықтан бұл сұраққа жауап бере алмаймын. Бірақ, провайдерлердің хабарлауынша, техникалық ақаулар болғаны рас.

(Үкімет отырысының сыртында 9 мамырдағы бірқатар қазақстандық сайттардың, соның ішінде «АЖ»-дың бұғатталуы туралы айтқаны)

БҚО полиция департаментінің баспасөз қызметі басшысы Болатбек БЕЛДІБЕКОВ:

- Құқық бұзушылықты жасаудың объективті жағы олардың бос плакатты көрсетуі емес, «Қазақстанда демократия мен сөз бостандығының жоқтығы туралы» саяси пікірі болып табылады, ол қоғамдық орында өз пікірін білдірді.

(Жазуы жоқ плакат ұстаған белсендіні ұстау туралы айтқаны)

Қазақстанның Бірінші президенті Нұрсұлтан НАЗАРБАЕВ:

- Қытай – тек көрші және экономикалық әріптесіміз ғана емес, Қазақстанның сенетін және сүйенетін жақын досы.

(Қытай Халық Республикасының төрағасы Си Цзиньпинмен кездесуі кезінде айтылды)

Саясаттанушы Досым СӘТПАЕВ:

- «Бейбіт революцияның болғанын қаламайтындар қарулы төңкерісті жақындата түседі» деген керемет афоризм бар. Қазір Қазақстанда эволюциялық дамудың барлық шарттары қалыптасқан. Көпшілік тұрақтылыққа дауыс беруге дайын, бірақ тоқырауға емес. Барлығы дамуға әкелетін тұрақтылықты қалайды.

(АРТиШОК театрында алдағы сайлауды талқылау кезінде айтылды)

ҚР Білім және ғылым министрі Күләш ШАМШИДЕНОВА:

- Біз ондай кештер тек мектептің аумағында ғана өтуі керек деп санаймыз. Артық ақша шашудың да қажеті жоқ. Аста-төк отырыс жасамау керек. Қымбат көйлек алудың да қажеті шамалы. Түлектер кеші өзара бәсеке үшін жасалмайды. Мектеппен қоштасу кеші жанға жайлы кездесу болып өтуі керек. Балалар, ата-аналар мен мұғалімдердің салиқалы бір отырысы болуы қажет.

(Үкіметте өткен брифингте айтылды)

Қазақстан Президенті Қасым-Жомарт ТОҚАЕВ:

Қазақстан – демократиялық мемлекет. Президент халықтың таңдауымен сайланады. Мен мемлекет басшысы ретінде сайлаудың таза, ашық әрі әділ өтуіне кепілдік беремін. Бұл – менің берік ұстанымым.

(9 сәуірде республикалық телеарналар эфирінде айтылды)

Қазақстанның Бірінші Президенті Нұрсұлтан НАЗАРБАЕВ:

- ...Ешкім білмейтін Қазақстан бүкіл әлемге танымал елге айналды. Қазақ деген халық бар екенін ешкім білмеді, - міне, қазір бәріне таныс. Қазақтардың бармаған, демалмаған жері жоқ, балалары әлемдік жоғары оқу орындарында оқиды, шетелде ем алады. Мұның барлығы еліміздің гүлденуі мен деңгейінің көтерілуіне байланысты.

(Алматы облысы Шамалған ауылы тұрғындарымен кездесуде айтылған)

ҚР Энергетика министрі Қанат БОЗЫМБАЕВ:

- Қазір ең басты мәселе - оны қалай тоқтатуда болып тұр. Бірінші орынбасарым сол жақта, оқиға орнында. Ол жұмыс істеп жатыр. Бүгін сол жерде штаб қандай да бір негізгі шешім қабылдайтын болады. Видеода газ, газ-су қоспасы жанып жатыр. Зардап шеккендер жоқ, ол жерде кәсіби мұнайшылар жұмыс істейді. Елді мекен алшақ орналасқан. Мұнан үлкен трагедия жасаудың қажеті жоқ. Мән-жайды анықтаймыз, кінәліні анықтаймыз. Олар шығынды өтейтін болады.

(Қаламқас кен орнындағы өртке қатысты айтқаны)

Қазақстан президенті Қасым-Жомарт ТОҚАЕВ:

- Біздің ұлы замандасымыздың, Қазақстан Республикасының Тұңғыш Президенті Нұрсұлтан Әбішұлы Назарбаевтың есімін келесі жолдармен мәңгі есте қалдыру дұрыс деп санаймын. Біздің астана Президентіміздің есімімен Нұрсұлтан деп аталуы керек. 

(Парламент палаталарының біріккен отырысында айтылды)