В Атырау +17 
Украина президенті Владимир Зеленский әскери қимылдарды қазіргі майдан шебі бойында тоқтатуды көздейтін бейбіт келісімді қарастыруға дайын екенін мәлімдеді.
Оған қатысты сұрақ Fox News арнасына берген сұхбаты кезінде қойылды. Журналист Украина ел аумағының 75%-ын немесе одан да көп бөлігін өз бақылауында сақтап қалса, қазіргі жағдайды «сол күйінде» бекітетін келісімге Украина басшысы келісе ме деп сұрады.
Зеленский бұл ұсынысқа келісетінін білдірді.
Оның айтуынша, әскери қимылдарды қазіргі майдан шебі бойында тоқтату соғысты аяқтауға мүмкіндік беруі мүмкін. Алайда бұл, ең алдымен, атысты тоқтату және майдан шебіндегі жағдайды уақытша тұрақтандыру туралы болып отыр. Бұл Ресей бақылауындағы аумақтарды заң жүзінде Ресейдің жері деп тануды білдірмейді.
Украина президенті сондай-ақ әскери қимылдар тоқтағаннан кейін Киевке АҚШ пен еуропалық серіктестер тарапынан сенімді қауіпсіздік кепілдіктері қажет екенін мәлімдеді. Бұған дейін Зеленский мұндай кепілдіктердің түрлі нұсқалары жеке құжатта рәсімделгенін және америкалық тараппен талқыланып жатқанын хабарлаған болатын.
Сонымен қатар Зеленский атысты тоқтатуды және Украина, АҚШ пен Ресейдің қатысуымен үшжақты келіссөздерді қайта бастауды қолдайтынын білдірді. Reuters агенттігінің хабарлауынша, ол АҚШ-тың арнайы өкілі Стив Уиткоффпен кездесуден кейін Киевтің дипломатиялық үдеріске қатысуға дайын екенін мәлімдеген.
21 қазанда Уиткофф Санкт-Петербургте Ресей президенті Владимир Путинмен кездесті. АҚШ өкілі Америка Құрама Штаттары, Ресей және Украина арасындағы келіссөздерді қайта бастауды қолдады. Дегенмен аумақ мәселесі мен Украинаның болашақтағы қауіпсіздік кепілдіктерін қоса алғанда, бірқатар негізгі мәселелер бойынша Мәскеу мен Киевтің ұстанымдары әлі де сәйкес келмейді.