В Атырау +21.3 
Құлсары қаласындағы гүлзарлар өріске айналды. Қаланы абаттандыру үшін отырғызылған сәндік өсімдіктерді жылқылар таптап, емін-еркін жайылып жүр.
Бір емес, бірнешеуі топталып, гүлдерді отап тастады. Тұрғындардың айтуынша, мұндай үйірлердің саны бірнешеу. Біреулер терін төгіп көгалдандырумен айналысып жатса, енді біреулері бұл еңбектің нәтижесін төрт түлігінің емін-еркін құртуына жол беріп отыр.
Жылыой ауданы әкімдігінің баспасөз қызметі қараусыз қалған жылқылардың иелері анықталып, әкімшілік жауапкершілікке тартылғанын хабарлады.
Айыппұлдар ҚР ӘҚБтК-нің үш бабы бойынша тағайындалды: 408 (ауыл шаруашылығы жануарларын жаю қағидаларын бұзу), 505 (абаттандыру қағидаларын бұзу) және 406 (ветеринария саласындағы заңнаманы бұзу).
Осылайша, жылқылардың қалалық гүлзарларда сайран салуы олардың иелері үшін әкімшілік жазаға айналды. Бұдан былай мал иелері төрт түлігіне мұқият қарап, ал гүлзарлар мал жайылатын алаң емес, қайтадан қаланың көркіне айналады деген үміт бар.
Ләззат ҚАРАЖАНОВА