«Барлық ойыншыға есік ашық»: Қазақстан құрамасының жаңа бапкері команда жасақтауда

Қазақстан ұлттық футбол құрамасының жаңа бас бапкері Джон ван ’т Шкип алдағы Ұлттар лигасына дайындық барысын және жаңартылған құрамды қалай жасақтап жатқанын айтты, деп хабарлайды amanvibe.kz.

Нидерланд маманы жазда қызметке кіріскелі бері ел стадиондарын аралап, ойыншыларды бақылап жүр. Соңғы күндері ол «Жетісу» – «Ордабасы», «Астана» – «Оқжетпес» және Чемпиондар лигасындағы «Қайрат» – «Левски» матчтарын тамашалады. Жақын күндері «Тобыл» – «Партизан» ойынын көруді жоспарлап отыр.

Ван ’т Шкиптің айтуынша, ұлттық құраманың есігі жоғары деңгей көрсеткен кез келген ойыншыға ашық: «Мен көп ойын көремін, бапкерлер штабымен және федерация қызметкерлерімен сөйлесемін, бейнематериалдарды талдаймын. Бұрын құрамда ойнаған футболшыларды да бақылап отырмыз, бірақ жаңа кандидаттарды да іздейміз. Әр ойыншы өз ойынымен мүмкіндікке ие бола алады», – деді ол.

Бапкерлік штаб ойыншылардың физикалық дайындығына ерекше көңіл бөлуде, себебі күзгі Ұлттар лигасы күнтізбесі өте тығыз: қысқа уақыт ішінде төрт матч өткізу жоспарланған.

Турнирлік мақсаттарға тоқталған нидерланд маманы шағын нәтижелерге қанағаттанбайтынын айтты: «Біз сапалы футбол көрсетіп, ұпай жинап, турнирді мүмкіндігінше жоғары аяқтағымыз келеді. Ал нақты мақсат әрқашан ең биік болуы тиіс — бірінші орын. Біз матчтарға дәл осындай көңіл-күймен дайындаламыз», – деп түйіндеді Джон ван ’т Шкип.

Бұл көзқарас жаңа бапкердің құраманы жасақтауда ашық әрі талапшыл бағыт ұстанып отырғанын көрсетеді.