В Атырау +18.1 
Атырауда Жангелдин ауылындағы отбасы қырғынына қатысты сотқа дейінгі тергеу аяқталды.
Басты күдікті — Сұлтан Сәрсемалиев кінәсін мойындап, қазір Атырау тергеу изоляторында сотты күтуде.
Дереккөздердің айтуынша, ол қылмыстық істің материалдарымен танысып, төрт адамды өлтіргенін мойындаған.
Сәрсемалиевке ҚР Қылмыстық кодексінің 99-бабы 2-бөлігі 1-тармағы («екі және одан да көп адамды өлтіру») бойынша айып тағылды. Сонымен қатар, тергеу барысында қосымша қылмыстық істер тіркелді: 188-бап — «Ұрлық» және 190-бап — «Алаяқтық»
Бұл айыптар марқұмдардың малын сатып жіберу және олардың банк карталарынан ақша жымқыру деректеріне қатысты.
- Барлық тергеу әрекеттері аяқталды, іс толық дайын және жақын күндері сотқа жіберіледі. Сот процесі осы айда басталмақ, - деп хабарлады дереккөз.
Бұған дейін Атырау облысының прокуратурасы Сұлтан Сәрсемалиев психологиялық-психиатриялық сараптама қорытындысы бойынша толық ақыл-есі дұрыс деп танылғанын хабарлаған. Бұл оның заң бойынша толық жауапкершілікке тартылатынын білдіреді.
Тағылған айыптарды ескерсек, оған өмір бойына бас бостандығынан айыру жазасы қолданылуы мүмкін.
Айгүл Мансурова