В Атырау -10 
2025 жылдың қазанында басталған эпидемиологиялық маусымнан бері Атырау облысында 304 қызылша жағдайы анықталды. Басым бөлігі - балалар.
Облыстық санитарлық-эпидемиологиялық бақылау департаменті басшысының орынбасары Гүлназ Ербатырованың айтуынша, 2026 жылдың қаңтарынан бастап өңірде апта сайын 20-ға дейін жаңа жағдай тіркелуде. Көбіне 7 жасқа дейінгі балалар, әсіресе нәрестелер ауырады.
СЭБД деректеріне сәйкес, ауырған 65 бала – бір жасқа дейінгі, тағы 150 бала – 1-4 жас аралығында. Науқастардың басым бөлігі екпе алмағандар. Түрлі кезеңде тоғыз бала жансақтау бөліміне түскен.
Қызылшаның алғашқы кезеңінде оны қарапайым тұмаумен шатастыруға болады: дене қызуы көтеріледі, жөтел мен мұрыннан су ағу байқалады. Айырмашылығы кейінірек шығады — денеде бөртпе пайда болады, - деп атап өтті Ербатырова.
Аурушаңдықтың өсуіне байланысты өңірде модульдік стационарда қосымша төсек-орындар ашылды. Облыстық инфекциялық аурухананың басшысы Нұрбек Үкібаевтың айтуынша, енді науқастарды белгілеріне қарай қабылдау бөлімінде бөледі.
Қазір инфекциялық ауруханада 293 пациент бар: 162-сі ЖРВИ-мен, 59-ы жедел ішек инфекцияларымен, 68-і қызылшамен ауырып түскендер. Қызылшаға шалдыққан науқастардың арасында жансақтау бөлімінде жатқандар жоқ.
Дәрігерлер қызылша – ең жұқпалы инфекциялардың бірі екенін еске салады. Одан қорғанудың жалғыз жолы – вакцинация. Нұрбек Үкібаевтың айтуынша, облыс толықтай вакцинамен және қажетті дәрі-дәрмекпен қамтамасыз етілген, ата-аналармен тұрақты түсіндіру жұмыстары жүргізілуде.
Анастасия ШЕРСТЯНКИНА