В Атырау +4 
Атыраудағы жеке стоматология клиникасында тіс емдеу кезінде дәрігер металл қондырманы пациенттің аузына түсіріп алған. Әйел оны байқамай жұтып қойған.
Зардап шеккен азаматшаның айтуынша, дәрігер жедел жәрдем шақырудың орнына құсықты шақырып, қондырманың өздігінен шығуын ұсынған. Бұл әрекет нәтиже бермеген соң, әйел облыстық аурухананың жарақат пунктіне жүгінуге мәжбүр болған.
Дәрігерлер рентген және гастроскопия жасап, асқазаннан бөгде затты анықтап, оны медициналық қысқашпен алып шыққан.
Пациент e-Өтініш порталы арқылы облыстық денсаулық сақтау басқармасына шағым түсірді.
«АЖ» редакциясының сауалына жауап берген ведомство бұл жағдайдың олардың құзыретіне кірмейтінін, себебі клиника жеке меншік екенін мәлімдеді.
Атырау облыстық стоматологтар қауымдастығының үйлестіру кеңесінің төрағасы Құрал Тишбаев мұндай жағдайлардың өте сирек кездесетінін атап өтті, алайда бұл оқиғада дәрігердің әрекетін орынсыз деп бағалады.
«Дәрігердің манипуляцияны жалғастырып, 103 қызметін шақырмауы — өрескел қателік. Тіпті зат кішкентай болса да. Мүмкін, ұштық ақаулы болған соң, содан бор түсіп кеткен шығар», — деп түсіндірді ол.
Қазіргі таңда пациент өзінің шағымына ресми жауап күтуде.
Анастасия ШЕРСТЯНКИНА