В Атырау +16.5 
Қазақстанда тіркелмеген ауыл шаруашылығы жануарларына қатысты жаңа шаралар енгізілмек. Бұл туралы 2025 жылғы 29 қазанда Мәжіліс кулуарында сөйлеген Ауыл шаруашылығы вице-министрі Азат Сұлтанов мәлімдеді, деп хабарлайды Zakon.kz.
Вице-министрдің айтуынша, тіркеуден өтпеген мал анықталған жағдайда, иелеріне әкімшілік жаза қолданылады.
– Біріншіден, айыппұл салынады. Екіншіден, тіркелмеген мал арнайы «штрафтық тұрақтарға» жеткізіліп, қажетті тіркеу рәсімдері аяқталғанша сол жерде ұсталады, – деді Азат Сұлтанов.
Министрлік өкілі мұндай шаралар елдегі жол-көлік оқиғаларының алдын алуға бағытталғанын атап өтті. Себебі иесіз жайылып жүрген мал жиі жолға шығып, апаттарға себеп болады. Сонымен қатар, бастама өзгенің жеріне малдың рұқсатсыз жайылу фактілерін азайтуға көмектеседі.
– Малды жаппай тіркеу қажет. Осы мақсатта заңнамаға өзгерістер енгізіліп, тіркелмеген жануарлар үшін жауапкершілік күшейтіледі, – деп түйіндеді вице-министр.