Атырауда құрылыс басқармасы бастығының орынбасары ұсталды

Атырауда облыстық ҰҚКД қызметкерлері Атырау облысы Құрылыс, сәулет және қала құрылысы басқармасының 33 жастағы орынбасары Талғат Бисенді ұстады.

«Ақ Жайыққа» белгілі болғандай, шенеунік кеше Құрманғазы ауданынан іссапардан оралған кезде, облыс әкімдігінің ғимаратында ұсталған.

Дереккөздер мәліметі бойынша, оған мердігер ұйымның басшысынан пара алу күдігі бойынша айып тағылған. Қазіргі уақытта оған ҚР ҚК 367-бабы («Пара алу») бойынша қылмыстық іс қозғалған. Ал ақша берген ЖШС басшысы ҚР ҚК 366-бабы («Пара беру») бойынша жауапқа тартылады. Мердігер компанияның кеңсесінде және облыс әкімдігі ғимаратында тінту жүргізілген.

Қазіргі уақытта шенеунік басқа жақақ кетпеу туралы қолхатпен босатылған, алайда тергеу бұлтартпау шарасын өзгертіп, оны қамауға алу туралы өтініш жасамақ. 

Тергеу жұмыстары жалғасып жатыр.

Айгүл МАНСУРОВА