В Атырау +4 
19 тамыз сағат 16:00 шамасында Индербор кентінде қатты жаңбыр мен екпінді желдің салдарынан кейбір ғимараттарға зақым келді.
Нұрманов көшесіндегі көпқабатты үйдің, Ш.Уәлиханов атындағы мектептің, балалар спорт залының және «Талап» базары ғимаратының шатырының бір бөлігі жерге құлап, «Ботақан» балабақшасының ойын алаңы қирады. Есбол ауылына барар жолда кей жерлерде электр бағаналары құлап қалды.
— Төтенше жағдайлар қызметкерлері мен мамандардың қатысуымен кеңес өткізілді. «Атырау Жарық» компаниясы бағаналарды қалпына келтіреді, ал ғимараттардың шатырларын жөндеуге тиісті тапсырма берілді, — деп хабарлады аудан әкімінің орынбасары Әсет Оразғалиев.
Сонымен қатар, Индер аудандық ТЖ бөлімінің құтқарушылары Ақкент көшесіндегі үйлердің бірінде сөгіліп кеткен шатырдың қауіпті бөлігін алып тастады. Зардап шеккен адам жоқ.
Ләззат ҚАРАЖАНОВА