Атыраудағы туберкулезбен ауыратын балаларға арналған жалғыз​ интернат жабыла ма?

Жарты ғасырдан астам уақыттан бері бұл балалардың мектебі болды, енді оны №45 мектепке беру жоспарланып отыр.

Мұндай шешімге тәрбиеленушілер мен қызметкерлер аң-таң. Ата-аналар балалары не себептен мектепсіз қалатынын түсінбей отыр.

"Біздің балаларымыздың басқалардан несі кем?" – деп налиды олар.

Облыстық денсаулық сақтау басқармасының дерегінше, өңірде туберкулезбен есепте тұрған 169 адам бар. Мұндай отбасылардың балаларын әдетте қарапайым мектептер мен балабақшаларға қабылдай бермейді – жұқтырып алудан қауіптенеді. Сол себепті бұл арнайы интернат – жалғыз қауіпсіз әрі әлеуметтік жағынан қажетті орын болып саналады.

Айкөркем Амангелдиева, Атырау қаласының тұрғыны:

– Анам науқас, сондықтан бізді түгел есепке қойды. Үш балам да осы жерде оқиды. Енді интернат жабылады деп отыр. Егер бұл рас болса, баратын жеріміз жоқ.

Дабыл қағып отырғандардың қатарында қызметкерлер де бар.

Айгүл Дүйсенғалиева, интернат қызметкері:

– Бірер күн бұрын №45 мектеп өкілдері келіп, ғимаратты алатынын айтты. Біз №8 балабақшада да, мұнда да оқымаймыз дейді. Сонда біз қайда барамыз? Жаңа оқу жылы таяп қалды. Біз бұл ғимаратта қалып, жұмысымызды жалғастыруды талап етеміз.

Ал облыстық білім беру басқармасы оның жабылуы туралы түпкілікті шешім қабылданбағанын айтады.

Марат Әбуов, басқарма басшысы:

– Мектепті жабу мәселесі қазір қарастырылып жатқан жоқ. Бұл – жалған ақпарат. Біз тек ғимаратты тиімді пайдалану жолдарын ойластырып жатырмыз. Мұғалімдер мен қызметкерлерге алдын ала ескертіледі, қажет болса, басқа мекемелерге жұмысқа орналастырамыз.

Дегенмен ата-аналар мен ұстаздар шешім әлдеқашан қабылданып қойғанына, ал өздерін жай ғана дайындап жатыр деп алаңдайды. Интернаттың болашағына қатысты соңғы шешім келесі оқу жылы басталғанға дейін қабылданатыны айтылған. Көп отбасы үшін бұл шешімді күту ауыр сынақтан өткенмен бірдей.

Айгүл Мансурова