Батыс Қазақстан облысында белгісіз ұшатын нысан табылды

Әлеуметтік желілерде 2025 жылғы 18 ақпанда сағат 23:10-да Бөкейорда ауданы Ұялы ауылдық округінің әкімдігіне жергілікті тұрғындардан Ұялы ауылынан 8 шақырым жерде (аудан орталығы – Сайқын ауылынан 180 шақырым жерде) белгісіз нысанның табылғаны туралы хабарлама келіп түскені жөнінде ақпарат пайда болды.

Сондай-ақ, алдын ала мәліметтер бойынша, табылған нысанның ұзындығы 120 см және құлаған ұшқышсыз ұшатын аппарат ("Орлан-10" ресейлік ұшқышсыз ұшу аппараты болуы мүмкін) болуы мүмкін екені хабарланды.

Оқиға орнына Ұялы ауылдық округінің полиция қызметкерлері жедел жеткен. Сонымен қатар аудан орталығы Сайқын ауылынан да мән-жайды анықтап, бағалау үшін әкімдік, полиция бөлімі мен төтенше жағдайлар қызметінің өкілдері жіберілді.

Қазіргі уақытта нысанның шығу тегі мен ықтимал мақсаты тексерілуде. Облыстық төтенше жағдайлар департаменті қызметкерлерінің оқиға орнына кеткенін растады, бірақ оқиғаның олардың құзыретінде еместігін атап өтті.

Бөкейорда ауданының әкімі Нұрлыбек Даумов бұл ақпаратты растады. Оның айтуынша, Батыс Қазақстан облысында табылған ұшқышсыз ұшатын аппарат қазақстандық әскерилерге берілген.

Оның айтуынша, ұшатын аппарат қазір Орал қаласында.

Айта кетейік, аудан аумағында ресейлік «Капустин Яр» әскери полигоны орналасқан.

Полиция департаменті уәкілетті қызметтермен бірлесіп, Батыс Қазақстан облысы Бөкейорда ауданындағы Ұялы ауылы ауданында белгісіз ұшатын нысанның табылуы бойынша тергеу жүргізіп жатыр.

Дайындаған Айнұр САПАРОВА