Спорт жаңалықтары

Бакуде (Әзірбайжан) дзюдодан Grand Slam турнирі аяқталды. Қазақстан құрамасы турнирде бір медаль жеңіп алды. Атырау қаласының өкілі Әбиба Әбужақынова 48 келіге дейінгі салмақ дәрежесінде жеңіс тұғырының үшінші сатысына көтерілді.

***

18-22 ақпанда Астанада белдесіп күресуден ҚР чемпионаты өтті. Көне күрестің палуандары екі алтын, бір күміс және бес қола медаль жеңіп алды. Республиканың кезекті жеңісінен кейін Нұржан Сәрсенғалиев қыркүйек айында Астанада өтетін әлем чемпионаты мен Көшпенділер ойындарына жолдама алды.

***

17-18 ақпанда Германияның Гейдельберг қаласында парадзюдодан дәстүрлі рейтингтік Гран-при өтті. Қазақстан құрамасы турнирде бес медаль жеңіп алды. Оның ішінде атыраулық спортшылар бір алтын, бір қола медальға қол жеткізді.

70 келіден жоғары салмақтағы жарыста +70 келі салмақтағы Зарина Райфова жеңімпаз, ерлер арасында 90 келіден жоғары салмақта Жұқамырза Шүкірбеков қола жүлдегер атанды.

***

16-18 ақпанда Кипрдің Ларнака қаласында WKF каратэден ересектер арасында «А» класы бойынша рейтингтік турнир өтті. Турнирге 125 елден мыңнан астам спортшы қатысты. ҚР құрамасында атыраулық Кенжебай Нұрбек ерекше көзге түсіп, 60 келіге дейінгі салмақта қола жүлдегер атанды.

***

Тегеранда таэквондодан «Fajr open G-1» рейтингтік турнирі өтті. Жарысқа сегіз елден 350 спортшы қатысты. Атыраулық Мария Севостьянова ұлттық құрама сапында ерекше өнер көрсетіп, күміс жүлдені иеленді.

Мұрат СҰЛТАНҒАЛИЕВ