Атырау облысы Қазақстандағы ластаушы заттар көлемі бойынша төртінші орында

Ластаушы заттардың негізгі көлемі Павлодар (724,2 мың тонна) және Қарағанды (469 мың тонна) облыстарының аумақтарында қалыптасқан. Осы екі өңірге еліміздегі ластаушы заттар шығарындыларының жалпы көлемінен 51,5% тиесілі.

Үшінші орында Ақтөбе облысы (136,5 мың тонна) және Атырау облысы төртінші орында (132,2 мың тонна). Ең төмен көрсеткіштер Жетісу, Қызылорда, Түркістан және Батыс Қазақстан облыстарында байқалды.

Тұрақты даму мақсаттары жөніндегі Хатшылық директорының орынбасары Алтынгүл ӨТЕБАЕВАНЫҢ мәліметі бойынша, Қазақстанда 2019 жылдан бастап стационарлық көздерден атмосфералық ауаға ластаушы заттар шығарындыларының жыл сайынғы төмендеуі байқалады. 2022 жылы олардың көлемі 2 314,7 мың тоннаны құрады, бұл соңғы 8 жылдағы ең жоғары деңгей тіркелген 2019 жылмен салыстырғанда 6,8%-ке аз.

Тиісінше, жан басына шаққандағы ластаушы заттар шығарындыларының көрсеткіші 2019 жылы 134,1 кг-нан 2022 жылы 117,9 кг-ға дейін (12,1% - ға) едәуір төмендеді.

Economy.kz дереккөзінің мәліметі бойынша, 2022 жылы атмосфералық ауаға шығарылған ластаушы заттардың жалпы көлемінің 1 868,5 мың тоннасы (80,7%) газ тәріздес және сұйық заттар, 446,3 мың тоннасы (19,3%) қатты заттар болды. Газ тәріздес және сұйық заттар негізінен күкіртті ангидридтен (SO2) – 44,0%, көміртегі тотығынан (CO) – 24,0%, азот оксидінен (NO2 ретінде) 16,7% тұрды.

ҚР СЖжРА Ұлттық статистика бюросының деректері бойынша 2022 жылы республиканың ауа бассейніне 213,4 тонна қорғасын және оның қосылыстары, 73,9 тонна марганец және оның қосылыстары, 103,1 тонна мыс оксиді, 382,2 тонна күкірт қышқылы, 53,8 тонна хлор, 264 килограмм сынап сияқты ерекше ластаушы заттар түсті. Бұл ретте, осы заттардың нақты шығарылуы белгіленген шекті рұқсат етілген шығарындылар көлемінен аспады.

ДДҰ-ның бағалауы бойынша 2019 жылы Қазақстанда үй шаруашылығындағы ауаның және атмосфералық ауаның ластануынан болатын өлім-жітімнің жас бойынша стандартталған коэффициенті 100 000 тұрғынға шаққанда 83,4 адамды құрады, бұл ДДҰ-ның Еуропалық өңірі бойынша орташа деңгейден едәуір жоғары (100000 тұрғынға шаққанда 44,5 өлім).

Анастасия ШЕРСТЯНКИНА