Атырауда митингке шыққандар қаңғыбас иттерді атуды жалғастыруды талап етті

30 сәуірде Атыраудағы Ретро саябаққа 60-қа жуық қала тұрғыны жиналды. Арасында әйелдер қауымы басым болды. Олар қаңғыбас иттерді ату шарасын қайтаруды талап етті.

Былтыр Атырау облысында бұралқы ит-мысықтарды жоюға 47 миллион теңге бөлінсе, оның 25 миллионы облыс орталығының үлесіне тиген. Бірақ қазіргі уақытта бұл жұмыс жүргізілмейді. 2020 жылға дейін қаңғыбас иттерді атумен жеке кәсіпкерлер айналысып келсе, енді бұл функция қалалық ветеринариялық станцияға өткеннен кейін жануар қорғаушылар бұл жұмысқа кедергі бола бастады. 2021 жылы жануар қорғаушылар жануарларды жоймай, оларды арнайы питомникте ұстауды талап етті. Олардың уәжін ескере отырып, әзірге тұрақты түрде ит атуды тоқтатып, қала тұрғындарынан нақты арыз-шағым түскен жағдайда ғана көзін жою туралы шешім қабылданды. 

Бүгінде «Аналарға көмек» қоғамдық қоры аналармен бірге ит атуды қайтаруды талап етуде. Олардың арасында балалары зардап шеккендер бар. Мысалы, Водников ауылы тұрғынының ұлын екі жыл бұрын ит қауып алған. Жақында №21 мектептің жанында осы мектептің оқушысын да ит қауып алды. Дәрігерлер баланы тексеріп, құтыру ауруына қарсы екпе салған соң, оны үйіне жіберді.

– Бұл оқиға осыдан 4 күн бұрын ғана болды. Мен сол жерге жақын тұрамын. Ұлым зардап шеккен баламен бір сыныпта оқиды. Мектептің төңірегінде үнемі 5-6 ит жүреді. Балам үшін қорқамын, ит көбейіп кеткен, сондықтан ит атуды қайтаруды талап етемін, – дейді Зухра ИЛЬЯСОВА.

Айтпақшы, бұл рұқсат етілген митинг. ҚБ жетекшісі әрі акцияны ұйымдастырушы Сандуғаш КӨКЕНОВА 15 күн бұрын қала әкімдігіне өтініш бергенін айтады.

Айнұр САПАРОВА

Суреттер мен бейнежазбаны түсірген автор