В Атырау -9 
Атырауда психоневрологиялық ауытқулары бар 98 бала тәрбиеленетін мектеп-интернатқа жүргізілген тексеру жұмыстары тәрбиешілердің мүгедек балаларға қатыгездікпен күш қолданатындығын анықтады. Бұл туралы Атырау облыстық прокуратурасының баспасөз қызметі хабарлады.
Интернат тәрбиешілері ұзақ уақыт бойына балаларды ұрып-соғып, жұмыс істеуге мәжбүрлеген. Олар физикалық кемшіліктеріне байланысты ешкімге ештеңе айта алмаған.
- Олар тіпті бақылау камераларынан да ығыспаған. Өкінішке орай, 2018 жылдың желтоқсан айынан биылғы қаңтар айына дейінгі жазбалар ғана сақталған. Бірақ бұл да сотқа дейінгі тергеп-тексеру жұмыстарын жүргізуге жеткілікті болды, - дейді Атырау облысының прокуроры Ернат СЫБАНҚҰЛОВ.
Интернаттың 9 қызметкеріне қатысты ҚР ҚК-нің 140-бабының 2-тармағы (Тәрбиешінің кәмелетке толмаған адамға қатыгездік танытуымен ұласқан тәрбиелеу жөнiндегi мiндеттердi орындамауы) бойынша сотқа дейінгі тергеу жұмыстары жүргізіліп жатыр, олар уақытша жұмыстан шеттетілген.
- Қылмыстық іс облыс прокурорының бақылауына алынды, - деп хабарлады прокуратураның баспасөз қызметі.
Фархат ӘБІЛОВ