В Атырау 0 
Қазақстан Президенті Мемлекеттік қызмет істері және сыбайлас жемқорлыққа қарсы іс-қимыл агенттігінің төрағасы Алик Шпекбаевты, Жоғарғы Сот төрағасы Жақып Асановты, «Самұрық-Қазына» акционерлік қоғамы басқармасының төрағасы Ахметжан Есімовті қабылдады. Бұл туралы Ақорданың ресми сайты хабарлады.
Кездесу барысында Қасым-Жомарт Тоқаевқа агенттіктің мемлекеттік қызмет саласындағы атқарған жұмыстары және сыбайлас жемқорлыққа қарсы іс-қимыл жөнінде қабылдаған шаралары туралы баяндалды.
Мемлекет басшысына агенттіктің мемлекеттік органдардағы жемқорлыққа қарсы күрес жөніндегі жұмыстары және мемлекеттік қызметшілерге еңбекақы төлеу жүйесін реформалау барысы туралы мәлімет берілді.
Сондай-ақ, Мемлекет басшысы Қасым-Жомарт Тоқаевқа сот жүйесін жаңғырту барысы жөнінде баяндалып, «100 нақты қадам» Ұлт жоспарын іске асыру аясындағы міндеттердің орындалуы туралы есеп берілді.
Қасым-Жомарт Тоқаев сот жүйесін жетілдіру жұмыстарын жалғастыруды және халықтың сот билігіне сенімін арттыруға бағытталған шаралардың тиімді жүзеге асырылуын қамтамасыз етуді тапсырды.
Кездесу барысында Мемлекет басшысына «Самұрық-Қазына» басқармасының төрағасы Ахметжан Есімов басқарманың биылғы екі айда атқарған жұмыстарының нәтижелері туралы есеп берді және Қордың даму стратегиясын жүзеге асыру аясындағы жоспарлары жөнінде баяндады.
Сонымен қатар, Қазақстан Президентіне «Самұрық-Қазына» акционерлік қоғамының компанияларын IPO-ға шығару және Қор активтерін жекешелендіру үдерістері жөнінде мәлімделді.
Кездесу соңында Қасым-Жомарт Тоқаев бірқатар нақты тапсырма берді.