Атырау, 29 наурыз 15:48
 ашықВ Атырау +4
$ 448.15
€ 483.46
₽ 4.86

Ерлан Қарин: Нұрсұлтан Назарбаевта қандай мәртебе мен өкілеттік сақталады

2 056 просмотра


«Қазақстан» телерадиокорпорациясының Басқарма төрағасы, белгілі саясаттанушы Ерлан Қарин ҚР Тұңғыш Президенті - Елбасы Нұрсұлтан Назарбаевтың мәртебесіне қатысты пікір білдірді, деп хабарлайды ҚазАқпарат тілшісі. 

«Енді Нұрсұлтан Назарбаевта қандай мәртебе мен өкілеттік сақталады? Президенттік өкілеттігі тоқтағаннан кейін Нұрсұлтан Назарбаев Тұңғыш Президент - Елбасы мәртебесіне ауысты. Бұл саяси-құқықтық мәртебе «Қазақстан Республикасының Тұңғыш Президенті - Елбасы туралы» Конституциялық Заңмен бекітілген. Аталған Заң Конституциялық екенін ерекше атап өткен жөн. Ол 2000 жылдың шідесінде қабылданып, 2010 және 2017 жылдары толықтырылды. Оның ішінде бастапқыдағы «Тұңғыш Президент» саяси-құқықтық мәртебесі Елбасы мәртебесімен кеңейтілді. Заңда президенттік өкілеттілік тоқтағаннан кейін, Нұрсұлтан Назарбаевтың айрықша құзыреті мен кепілдіктері, сондай-ақ саяси әрі құқықтық жағдайы белгіленген», - деп жазды Е. Қарин Telegram-дағы парақшасында.  

Осы орайда Е. Қарин аталған заңға сәйкес, Тұңғыш Президент - Елбасы Қауіпсіздік Кеңесін, Қазақстан халқы Ассамблеясын басқаратынын, Конституциялық Кеңестің құрамына енетінін еске салды. Сонымен қатар, Елбасы ел үшін маңызды мәселелерді талқылау кезінде Парламентте, Үкімет отырыстарында сөз сөйлеуге құқылы. Нұрсұлтан Назарбаев мемлекеттік құрылыс, ішкі және сыртқы саясат, сондай-ақ ел қауіпсіздігіне қатысты маңызды мәселелер бойынша бастамалармен Қазақстан халқына, мемлекеттік органдар мен лауазымды тұлғаларға үндеу жасай алады. Мұнымен қоса, Н. Назарбаевтың бастамалары мемлекеттік органдармен, лауазымды тұлғалармен қарастыруға міндетті болып саналады. Мемлекеттік саясаттың негізгі бағыттары бойынша бастамалар міндетті тәртіпте онымен бірге келісуге жатады. Тұңғыш Президент-Елбасы қызметін қамтамасыз ету үшін Кеңсе құрылады. Нұрсұлтан Назарбаевтың қауіпсіздігін қамтамасыз ету ҚР Мемлекеттік күзет қызметі бөлімшесіне жүктеледі. 

«Қазақстан Республикасының Тұңғыш Президенті - Елбасы туралы» Конституциялық Заңда бекітілген айрықша құзыреттен бөлек, Нұрсұлтан Назарбаев Nur Otan партиясының Төрағасы болып қала береді. Партия мүшелері Парламент пен жергілікті атқарушы органдарда басым көпшілікке ие. Бір сөзбен айтқанда, әлемдік саяси тарихта жаңа феномен пайда болды - ол саяси көшбасшылықтың қазақстандық моделі», - деп түйді Ерлан Қарин.

Дереккөз: inform.kz

20 наурыз 2019, 10:36

Қате таптыңыз ба? Тінтуірмен белгілеп, Ctrl + Enter түймесін басыңыз.

Осы мақала тақырыбына қатысты ой-пікіріңізбен бөлісіп, бейнежазба жолдағыңыз келсе, WhatsApp +7 771 37 800 38 нөміріне және editor@azh.kz поштасына жібере аласыз.