В Атырау
-1 
АҚШ Сан-Францискодағы Ресей бас консулдығының территориясына "заңсыз кірді" деген ақпаратты теріске шығарды. АҚШ Мемлекеттік департаменті ғимарат күзеті тек дипломаттар мен олардың отбасы белгіленген уақытта резиденцияны босатқан, я босатпағанын тексергенін мәлімдеді.
Мемлекеттік департамент өкілі Хизер Нойерт ғимаратты қарау кезінде құлыптары бұзылмағанын және арнайы қызмет қатыспағанын айтады. АҚШ билігі ресейлік дипломаттарға ғимаратты босату үшін 1 қазанға дейін қосымша уақыт берген.
Таяуда Ресей сыртқы істер министрлігі АҚШ билігі Сан-Францискодағы консулдығына "басып кірді" деп мәлімдеме жасап, наразылығын білдірген. Министрлік ғимараттың есігі бұзылғанын айтқан.
Биыл шілде айында Кремль Конгрестің Мәскеуге қарсы санкцияларын ұзартуға жауап ретінде, АҚШ-тан елшілік және консулдықтағы қызметкерлерді қысқартуды талап еткен болатын. Вашингтон болса, Сан-Францискодағы бас консулдықты және Вашингтон мен Нью-Йорктегі өкілдікті жабатынын мәлімдеген. АҚШ-тың Ресейдегі бұрынғы елшісі Джон Теффт Азаттыққа берген сұхбатында "ресейлік дипломаттарға қысым көрсетіп жатыр" деген ақпараттың жалған екенін айтқан.
Дереккөз: Азаттық