МӘМС: алғашқы атыраулық миллиардтар

Қазақстанда өтіп жатқан науқанға байланысты денсаулық сақтау мекемелеріне 611923 адам тіркелген. Атырау облысы бойынша «Әлеуметтік медициналық сақтандыру қорының» шотына 2 млрд. 790 млн. теңге ақша түскен. Бұл жөнінде өткен брифингте жергілікті филиалдың директоры Байтолла ҒАЗИЗОВ мәлімдеді.

Оның айтуынша, облыстағы медициналық ұйымдарға қатысты шағымдарды «МСҚ: Халықтық бақылау» атты мобильді қосымшасы арқылы қабылдайды.

«АЖ» сұрақтары:

- Міндетті әлеуметтік медициналық сақтандыру (МӘМС) аясында келісімшартқа қол қойған жеке меншік емханаларға қандай талаптар қойылады?

- Медициналық ұйымның базасы қажетті құралдар мен аппараттармен жабдықталуы тиіс. Азаматтарды қабылдайтын әр дәрігердің 3 медбикесі болуы шарт.

- Қорға жарнаны біресе аударып, біресе аудармайтын жұмыс берушіге қатысты қандай да бір шаралар қолданылады ма?

- Осындай жағдай кезінде қай қызметкерінің жарнасын кешіктірсе, сол қызметкеріне төленетін жарна көлеміне сәйкес өсімпұл (пеня) қосылады. Өсімпұл көлемі әр түрлі және бұл заңмен қаралған.

- Кейбір жеке клиникалар сіздермен серіктес болудан бас тартып жатыр. Осының себебі неде?

- Әртүрлі себептер бар ғой. Барлығы да ерікті түрде МӘМС қатысушысы бола алады,ешкімді күштемейміз. Мүмкін қойылатын талаптарға жауап бере алмағасын бас тартқан болар.

Фархат ӘБІЛОВ

Сурет пен бейнежазбаны түсірген Нұрбейбіт НҰҒЫМАНОВ