Зиянды әкесі өтеді

Атырау облысының кәмелетке толмағандардың істері жөніндегі мамандандырылған ауданаралық соты ҚР ҚК-нің 188-бабы («Ұрлық») бойынша үкім шығарды.

Атыраудың кәмелетке толмаған тұрғыны өткен жылдың қыркүйегінде қала маңында жасаған 13 ұрлығы үшін сотталып, шартты түрде 1 жыл алған. Бірақ ол бұл әдетін доғармады: биылғы маусым айында ол Еркінқала-2, Балауса, Жұлдыз-2, Жұмыскер-1,2, Геолог-2 және Томарлы ықшамаудандарында наурыз бен мамыр аралығында жалпы сомасы 5 млн теңгеден астам болатын 11 ұрлыққа күдікті ретінде ұсталған. Үй иелерінің ақшалары, зергерлік бұйымдары және жеке заттары оның олжасына айналған.

Сотта ол өз кінәсін толық мойындап, жасаған ісіне өкініш білдірді. Қылмыстық іс қысқартылған тәртіппен іс жүргізу келісімі бойынша қаралып, 3 жылға бас бостандығынан айыру жазасына кесілді. Зардап шегушілерге тигізілген зиян заңды өкілден – сотталушының әкесінен өндіріліп алынды.

Мұрат СҰЛТАНҒАЛИЕВ