Көлікті қуған полицейлер жол апатына ұрынды

23 сәуірде сағат 05.30-да SsangYoung арнайы көлігіндегі «Батыс-25» полицей экипажы жүргізушісі тоқтау талабына бағынбаған «Тойота Хайлюкс» көлігінің ізіне түсті. Қуғын кезінде полицей машинасы Абай мен Махамбет көшелерінің қиылысында «Фольксваген-Поло» көлігімен соқтығысып, содан соң бағдаршамның металл бағанасына соқтықты.

ІІД баспасөз қызметінің жетекшісі Гүләзира МҰХТАРОВАНЫҢ айтуынша, жол-көлік оқиғасынан кейін SsangYoung көлігіндегі екі полицей және «Фольксваген-Поло» жүргізушісі мен жолаушысы алғашқы медициналық көмек алып, үйлеріне жіберілді.

Ал бір сағаттан кейін жол подициясының қызметкерлері Игілік (бұрынғы Дзержинский) көшесінде «Тойота Хайлюкс» көлігін ұстады. Рөлде 30 жастағы Атырау тұрғыны отырған, ол медициналық куәландыру нәтижесіне сәйкес, жеңіл дәрежедегі алкогольдік мас күйде болған. «Тойота» жүргізушісіне де, SsangYoung көлігінде отырған полицейге де қатысты әкімшілік хаттама толтырылды. Бұдан басқа, қызметтік тергеу амалдары жүргізіледі.

Мұрат СҰЛТАНҒАЛИЕВ