Браконьерлікке күдіктілер ұсталды. Бір қызығы, қылмыстық топ құрамында шекарашы да болған.
Атырау қалалық №2 соты оларға 2 ай мерзімге қамауға алу түрінде бұлтартпау шарасын қолдануға санкция берді.
Тергеу болжамы бойынша, бекіре тұқымдас балықтарды заңсыз аулау және өткізуге күдікті екі азамат пен №2201 «Г» әскери бөлімшесі 2-ші коменданттық взводы бөлімшесінің командирі Т.К.қылмыстық топ құрып, Жайық-Каспий балық-шаруашылық бассейнінде заңсыз балық аулаумен айналысқан. Уылдырық коммерциялық мақсатта өндірілген.
Атырау облыстық сотының баспасөз қызметінің мәліметтері бойынша, тергеу органдары күдіктілерге қатысты ҚР ҚК-нің 262-бабы («Ұйымдасқан топ, қылмыстық ұйым құру және оларға басшылық ету, сол сияқты оларға қатысу»), 335-бабы (« Балық ресурстарын, басқа да су жануарларын немесе өсiмдiктерін заңсыз алу») және 196-бабы («Көрiнеу қылмыстық жолмен табылған мүлiктi иемдену немесе өткізу») бойынша қылмыстық іс қозғады.
Зульфия БАЙНЕКЕЕВА