Қазақ қызы Australian Open турнирінің сенсациясы атанды

«Үлкен дулыға» турнирінің үшінші айналымына алғаш рет шығып отырған қазақстандық теннисші Зарина Дияс Sports.ru порталының бағалауы бойынша аталмыш доданың жаңалығы деп танылды. Бұл туралы Vesti.kz сайты хабарлап отыр.

Басылымның жазуынша, 20 жасар қазақ қызы Мельбурнде теннистен өтіп жатқан Аустралияның Ашық чемпионатында спорт әлемі үшін үлкен сенсацияға айналды. Бұрын З.Дияс турнирдің біліктілік кезеңінен өте алмаушы еді. Ал қазір ол 1/16 финалға өтіп отыр.

Еске сала кетейік, Australian Open додасының біліктілік сайысынан сәтті өткен З.Дияс бірінші айналымда чехиялық Катерина Синякованы, екінші айналымда Марина Эраковичті жеңген болатын.

Ертең, 18 қаңтар күні жерлесіміз әлемнің 11-ракеткасы 22 жасар румыниялық спортшы Симона Халеппен кездесу өткізеді.

Дереккөз: ҚазАқпарат