Әблязовтың зайыбына қатысты бұлтартпау шарасы ешқайда шықпау туралы қолхаттан қаржылық кепiлдiкке өзгертiлдi – СІМ

Қазақстанның құқық қорғау органдары  БТА Банкінің бұрынғы басшысы Мұхтар Әблязовтың зайыбы Алма Шалабаеваға қатысты бұлтартпау шарасы ешқайда шықпау туралы қолхаттан қаржылық кепiлдiкке өзгертті, деп хабарлайды ҚР Сыртқы iстер министрлiгiнде өткен брифингте ведомствоның ресми өклi Жанболат Үсенов. 

«Қазақстанның құқық қорғау органдары Алма Шалабаеваға қатысты бұлтартпау шарасын Алматы қаласынан тыс ешқайда шықпау туралы қолхаттан қаржылық кепiлдiкке өзгерту туралы шешiм қабылдады. Бұл шешiм Алма Шалабаеваның жеке өтiнiшi, сондай-ақ италиялық үкiмет үндеулерiнiң негiзiнде қабылданды. Италия Қазақстанның маңызды серiктесi болып табылады. Осы орайда, бiз аталған мәселеге қатысты осы елдiң сыртқы iстер министрлiгiмен бiрлесе отырып, констурктивтi жұмыс атқардық», - дедi Үсенов. 

Сыртқы ведомствоның ресми өкiлi атап өткендей, Қазақстанның құқық қорғау органдары Алма Шалабаеваға және оның қызына жаңа төлқұжаттарды алуға көмектестi. 

«Алма Шалабаева ағымдағы жылдың шiлде айынан бастап Алматы қаласындағы ата- анасының үйінде тұрып келдi. Қазақстанның құқық қорғау органдары Алма Шалабаеваға және оның қызына жаңа төлқұжаттарды алуға қолғабыс көрсеттi. Осыған байланысты олар шетелдiк виза алу мүмкiндiгiне ие болып отыр. Бүгiннен бастап ол өзiнiң қалауы бойынша кез-келген шетелдiк мемлекетке шыға алады», - дедi ол.

Дереккөздер: Қазақстан жаңалықтары АА.