Сот А.Мешімбаеваның ісі бойынша 9 желтоқсанға дейін үзіліс жариялады

4 желтоқсан күні Астана қалалық №2 Есіл аудандық сотында ҚР Статистика агенттігінің бұрынғы төрайымы А.Мешімбаеваға қатысты қылмыстық іс қаралды, деп хабарлады Жоғарғы соттың баспасөз қызметі.

«Ол ҚР ҚК 176б. 3б. «б,г» т. қарастырылған қылмыстарды жасады, яғни мемлекеттік функцияларды атқаруға өкілетті тұлға аса ірі көлемде оған сеніп тапсырылған бөтен мүлікті иемденіп, ысырап қылды деп айыпталуда. Сондай-ақ, оған ҚР ҚК 307б.3б. бойынша, яғни қызметтік өкілеттігін асыра пайдалану арқылы пайда көрді деп айып тағылуда», - делінген ақпаратта.

Соттың бірінші отырысында жәбірленушінің өкілі – ҚР Статистика агенттігінің қызметкерінен жауап алынды. Сот 9 желтоқсанға дейін үзіліс жариялады.

Сот процесі ашық режимде, орыс тілінде судья Ақмарал Исаеваның төрағалығымен өтіп жатыр.

Дереккөз: bnews.kz