«Эйр Астана» ұшақтарында 9 рет қоқан-лоққы көрсету оқиғасы тіркелген

2013 жылдың алғашқы жартыжылдығында «Эйр Астана» әуе компаниясының ұшақ борттарында 9 рет қоқан-лоққы көрсету оқиғасы тіркелген. Бұл туралы бүгін «Эйр Астана» әуе компаниясын дамытуға қатысты мәселе бойынша өткен брифингте «Самұрық Қазына» АҚ-ның басқарушы директоры Нұржан Байдәулетов мәлімдеді, деп хабарлайды BNews.kz тілшісі.

«Түрлі себептерден рейстердің кешіктіріледі. Оның бірі – жолаушылардың бұзақылық әрекеті. Статистикаға жүгінсек, биыл алғашқы жартыжылдықта 141 осындай оқиға тіркелген. Оның 105-і ұшіп келе жатқанда орын алған», - деді Нұржан Байдәулетов.

Оның айтуына қарағанда, ең көп тәртіп бұзу – ұшақ бортында шылым шегу екен.

«Тәртіп бұзушылықтың тең жартысы – шылым шегуге қатысты. Бұл барлық жолаушылар үшін де қауіпті, өйткені бір адам шылым шексе бортта өрт шығуы мүмкін. Тәртіп бұзғандардың үштен бірі – бортсерік пен жолаушыларға тіл тигізгендер», - дейді ол.

«Самұрық Қазына» АҚ-ның басқарушы директоры айтуына қарағанда, ұшу қауіпсіздігі нұсқаулығына бағынбай, ұшқыш кабинасына кіргісі келген жолаушылар да болыпты.

«9 оқиға жолаушылар мен әуе компания қызметкерлеріне қоқан-лоққы көрсетуге қатысты. Барлық оқиға рейстің кешігуіне әсер етеді. Осындай әрекеттер борттағы жағдайдың ушығуына әкеліп соғады. Тіпті қажет болған жағдайда ұшақ әуежайға қайтып оралады», - деді Н.Байдәулетов

Дереккөз: BNews.kz