В Атырау +3.7 
Қазақстанда ірі қара малдың эмбриондарын алу, мұздату және трансплантациялау жұмыстарымен айналысатын зертхана ашу жоспарланып отыр. Бұл туралы ҚР Ауыл шаруашылығы министрлігі хабарлады. Ведомство америкалық Trans Ova Genetics компаниясымен ынтымақтастық туралы меморандумға қол қойып, осындай келісімге келген.
Келісімге Ауыл шаруашылығы вице-министрі Аманғали Бердалиннің АҚШ-қа сапары барысында қол қойылды. Сапар аясында ол Монтана және Айдахо штаттарының ауыл шаруашылығы ведомстволары мен бизнес өкілдерімен кездесті.
Америкалық мамандар қазақстандық әріптестерін эмбриондармен жұмыс істеуге үйретуге көмектеседі. Тараптар асыл тұқымды мал жеткізу және америкалық стандарттарға сай мал аукциондарын өткізуді үйрету мәселелерін де талқылады.
Ауыл шаруашылығы министрлігінің мәліметінше, соңғы жылдары Қазақстанда 100-ден астам заманауи сүт фермасы салынған. Олардың әрқайсысының құрылысына орта есеппен шамамен 9 млн доллар жұмсалған.
Алдағы уақытта тағы 50 ферма салу жоспарланып отыр. Бұл жобаларға жеңілдетілген несие қарастырылған. Америкалық компанияларға сүт фермаларын қажетті жабдықтармен қамтамасыз етуге және Орталық Азия нарығына шығу перспективасымен Қазақстанда жабдық құрастыру өндірісін жолға қоюға қатысу ұсынылды.