В Атырау +1.9 
Қазақстанның Еңбек және халықты әлеуметтік қорғау министрлігі азаматтарды жұмыспен қамтуда жаңа тәсілді енгізіп жатыр. Енді мемлекет ақпараттық жүйелер арқылы жұмыс іздеуі мүмкін азаматтарды өзі анықтап, олардың мансап орталықтарына жүгінуін күтпей-ақ, жұмысқа орналасуға көмек ұсынады.
Жаңа тетік «Цифрлық жұмыспен қамту қызметі» жобасы аясында жүзеге асырылуда. Ол азаматтардың өтінішіне негізделген жұмыс тәсілінен оларды жұмысқа орналасқанға дейін проактивті сүйемелдеуге көшуді көздейді.
Мемлекеттік ақпараттық жүйелердегі мәліметтер негізінде жұмысқа мұқтаж болуы мүмкін азаматтар анықталады. Олар көмек алу үшін Enbek.kz электрондық еңбек биржасын пайдалана алады.
Азаматтың келісімімен жүйе оның білімі, еңбек өтілі мен кәсіби дағдылары туралы ақпаратты қамтитын цифрлық түйіндемені автоматты түрде қалыптастырады. Жасанды интеллект лайықты бос жұмыс орындарын іріктеп, жеке ұсыныстар береді.
Жұмыс іздеушілермен байланыс орнату үшін ұялы телефон арқылы қолжетімді жасанды интеллект көмекшісі қарастырылған. Диалог форматында азаматтар өз қалаулары туралы айтып, еңбек жағдайларын нақтылап, бос жұмыс орындары, оқыту және жұмыспен қамтуды мемлекеттік қолдау шаралары бойынша ұсыныстар ала алады.
Сонымен қатар цифрлық сервис мансап орталықтарының мамандарын алмастырмайды. Олар жұмыс іздеушілерге түйіндеме жасауға, бос жұмыс орындарына өтінім беруге, жұмыс берушілермен байланыс орнатуға және әңгімелесуге дайындалуға көмектеседі. Егер азамат жұмысқа орналаса алмаса, маман оның себептерін анықтап, онымен бірге алдағы іс-қимыл жоспарын әзірлеуі тиіс.
Қазір жоба Қазақстанның екі өңірінде – Павлодар және Маңғыстау облыстарында жүзеге асырылуда. Онда жоба 2026 жылғы шілдеде іске қосылған. Осы уақыт ішінде 59,2 мың азаматқа жұмысқа орналасуға жәрдемдесу ұсынылған. Олардың 7,5 мыңы жұмысқа орналасқан. Бұл ұсыныс алған азаматтардың жалпы санының шамамен 12,7%-ын құрайды.
2026 жылдың соңына дейін Еңбек министрлігі жаңа тетікті Атырау облысын қоса алғанда, Қазақстанның барлық өңіріне енгізуді жоспарлап отыр.