В Атырау +1.9 
Қазақстанда төрт кәмелетке толмаған баланы тәрбиелеп отырған қаза тапқан әскери қызметшінің жесірі сот арқылы біржолғы ақшалай өтемақы төлеуге қол жеткізді. Ұлттық ұланның әскери бөлімі әйелге өтемақы төлеуден бас тартып, өтініш беру үшін белгіленген үш жылдық мерзімнің өтіп кеткенін алға тартқан.
Қазақстан Республикасының Әскери сотының хабарлауынша, әйелдің жұбайы Ұлттық ұланда әскери қызмет атқарған. Ол 2022 жылғы 27 қыркүйекте әскери қызметін өткеру кезінде жол-көлік оқиғасы салдарынан қаза тапқан.
Күйеуі қайтыс болғаннан кейін әйел біржолғы ақшалай өтемақы тағайындау туралы өтініш бергенімен, оған бас тартылған. Осыған байланысты жесір әйел Алматы гарнизонының Әскери сотына жүгінуге мәжбүр болған.
Істі қарау барысында сот әйелдің жұбайынан айырылғаннан кейінгі ауыр психоэмоционалдық жағдайын, төрт баланы жалғыз тәрбиелеп, материалдық жағынан қамтамасыз ету қажеттігін, балаларының біріне жасалған ота мен ұзақ уақытқа созылған оңалту шараларын, сондай-ақ тұрғын үй мәселелері мен мәжбүрлі қоныс аудару жағдайларын ескерді.
Сот өтініш беру мерзімін өткізіп алудың себептерін дәлелді деп танып, ҚР Азаматтық кодексінің 185-бабына сәйкес мерзімді қалпына келтірді.
Сот шешімінде қаза тапқан әскери қызметшінің отбасының әлеуметтік қорғауға құқығы оның қайтыс болу фактісінен тікелей туындайтыны және мерзімді өткізіп алудың дәлелді себептері болған жағдайда, өтініш беру мерзімін формалды түрде сақтамау бұл құқықты шектеуге негіз бола алмайтыны атап өтілген.
Нәтижесінде сот жесір әйелдің талап-арызын толық қанағаттандырып, Ұлттық ұланның әскери бөлімін оған қаза тапқан жұбайының бес жылдық ақшалай қамтылымы мөлшерінде, яғни 8 083 620 теңге біржолғы өтемақы тағайындап, төлеуге міндеттеді.
Бұдан бөлек, әскери бөлімнен 2163 теңге көлемінде мемлекеттік баж төлеуге жұмсалған сот шығындары өндірілді.
Сот шешімі заңды күшіне енді.