В Атырау +5.4 
Атырау қалалық №2 соты «ҚазАвтоЖол» ҰК» АҚ-ның еншілес мекемесі — «ҚАЖсервис» ЖШС филиалының бас бухгалтеріне қатысты үкім кесті. Ол 34,8 миллион теңге бюджет қаражатын жымқырғаны үшін кінәлі деп танылды.
Прокурорлық тексеру мен сотқа дейінгі тергеп-тексеру барысында бас бухгалтердің заңсыз төлемдерді есептеп, ұйымның ірі көлемдегі қаражатын өзінің жеке банктік шотына жүйелі түрде аударып келгені дәлелденді. Заңбұзушылықты Атырау көлік прокуратурасы өңірлік Экономикалық тергеп-тексеру департаментімен бірлесіп анықтаған.
Сот үкімімен ол ҚР Қылмыстық кодексінің 189-бабы 4-бөлігінің 2-тармағы бойынша кінәлі деп танылып, 5 жылға бас бостандығынан айырылды. Сондай-ақ сотталған азаматша 5 жыл бойы материалдық жауапкершілікпен байланысты қызметтерді атқару құқығынан айырылды.
Бұдан бөлек, сот «ҚАЖсервис» ЖШС-нің келтірілген материалдық шығынды өндіріп алу туралы азаматтық талап арызын толық көлемде қанағаттандырды. Сот үкімі әлі заңды күшіне енген жоқ.