В Атырау +2.9 
2026 жылдың алғашқы сегіз айында Қазақстан жалпы құны 263,9 миллион доллар болатын 539,5 мың тонна жеміс-жидек импорттады. Өткен жылдың сәйкес кезеңімен салыстырғанда жеткізілім көлемі 1 пайызға өсті, деп хабарлайды LS.
Сарапшылар сұраныстың айтарлықтай өзгергенін тіркеді: қазақстандықтар экзотикалық жемістер мен цитрус өнімдерін көбірек сатып ала бастаған. Ал үйреншікті алма мен бақша өнімдерінің импорты азайған.
Қандай өнімдер көбірек импортталды?
Цитрус жемістері (апельсин, мандарин, лимон, грейпфрут): жеткізілім көлемі бірден 22,9 пайызға өсіп, 115,8 мың тоннаға жетті. Негізгі жеткізушілер — Қытай, Пәкістан, Түркия, Өзбекстан, Мысыр, Иран, Аргентина, Оңтүстік Африка Республикасы, Марокко және Тәжікстан.
Банан: импорт 12,4 пайызға артып, 76,1 мың тоннаны құрады. Жеткізілім бойынша Эквадор көш бастап тұр (75,3 мың тонна). Сондай-ақ Қытай мен Ресейден аз көлемде өнім әкелінген.
Экзотикалық жемістер (құрма, ананас, авокадо, манго, інжір): сатып алу көлемі 5,9 пайызға өсіп, 32,6 мың тоннаға жетті. Негізгі көлем Иран мен Қытайдан, сондай-ақ Перу, Израиль, Түркия және Ирактан жеткізілген.
Қай өнімдердің импорты азайды?
Алма, алмұрт және айва: импорт 11 пайызға қысқарып, 95,1 мың тоннаны құрады. Өнімдер Польша, Қытай, Өзбекстан, Иран, Қырғызстан, Әзербайжан, Бельгия және Ауғанстаннан жеткізілген.
Бүлдірген, таңқурай, құрма, киви және анар: ең үлкен төмендеу тіркелді — 17,9 пайыз. Импорт көлемі 26,6 мың тоннаға дейін азайды. Негізгі жеткізушілер — Қытай, Иран, Өзбекстан, Қырғызстан, Әзербайжан және Мысыр.
Қарбыз бен қауын: импорт 7,3 пайызға төмендеп, 57,9 мың тоннаны құрады. Негізгі көлемді дәстүрлі түрде Өзбекстан жеткізген. Сондай-ақ Қытай, Иран, Ауғанстан, Тәжікстан және Испаниядан аз мөлшерде өнім сатып алынған.
Жүзім: импорт 6 пайызға азайып, 63 мың тоннаны құрады. Өнім Өзбекстан, Қытай, Тәжікстан, Иран, Ауғанстан және Мысырдан әкелінген.
Шабдалы, алхоры және өрік: сатып алу көлемі 0,9 пайызға аздап төмендеп, 72,4 мың тоннаны құрады.