​Бензин 300, ал дизель 400 теңге болады ма? Үкімет сарапшылардың болжамына жауап берді

Қазақстанда Жаңа жыл қарсаңында бензин мен дизель отынының бағасы қымбаттай ма, бұл туралы энергетика министрі Ерлан Ақкенженов айтып берді.

Үкіметте өткен баспасөз конференциясында сөз сөйлеген ведомство басшысы қазақстандықтардың алаңдауына ешқандай негіз жоқ екенін мәлімдеді. Қазір АИ-92 маркалы бензиннің құны литріне 253–271 теңге аралығында ауытқып тұр, ал дизель отыны 356–367 теңгеден сатылып жатыр.

Министрдің айтуынша, ел отынмен толық қамтамасыз етілген:

• Бензин қоры: 400 мың тоннадан астам;

• Дизель отынының қоры: 400 мың тоннадан астам;

• Барлық отандық мұнай өңдеу зауыттары штаттық режимде жұмыс істеп тұр, ал өңірлерге жөнелту кідіріссіз жүзеге асырылып жатыр.

Сарапшылардың болжамы мен Энергетика министрлігінің жауабы

Бұған дейін сарапшылар ортасында жанар-жағармай материалдарының қымбаттауы мүмкін деген қауіп аталған болатын. Атап айтқанда, мұнай-газ саласының сарапшысы Асқар Исмаилов 2027 жылдың соңына қарай Астана мен Алматыда АИ-92 бағасы 300 теңгеден, ал дизель отыны литріне 400 теңгеден асып түсуі мүмкін деген болжам жасады. Оның келтірген негізгі себептің қатарында көршілес елдердің бағасымен теңесу, тасымалдау құнының өсуі және салаға инвестиция қажеттілігі бар.

Алайда Ерлан Ақкенженов бұл қауіпті растамай, елімізде отынның күрт қымбаттауына нақты негіз жоқ екенін атап өтті.

«Егер баға күрт шарықтайтын болса, мемлекет шұғыл түрде араласып, барлық қажетті шараларды қабылдауға дайын», – деп түйіндеді Энергетика министрлігінің басшысы.